தர்மசாலா: ஆப்கானிஸ்தானுக்கு எதிரான முதல் ஒருநாள் போட்டியில் அறிமுகமான வேகப்பந்து வீச்சாளர் குர்னூர் பிரார், தனது உயரம் மற்றும் பந்துவீச்சு வேகம் காரணமாகவே இந்திய அணியில் விரைவாக சேர்க்கப்பட்டுள்ளார் என்று முன்னாள் இந்திய கிரிக்கெட் வீரர் வசீம் ஜாபர் தெரிவித்துள்ளார்.
தர்மசாலாவில் ஜூன் 13 சனிக்கிழமை அன்று நடைபெற்ற இந்தப் போட்டியில் சிறப்பாக செயல்பட்ட 26 வயதான குர்னூர், 4.5 ஓவர்களில் 27 ரன்கள் மட்டுமே விட்டுக்கொடுத்து 3 விக்கெட்டுகளை வீழ்த்தினார். மழை காரணமாக தலா 25 ஓவர்களாகக் குறைக்கப்பட்ட இப்போட்டியில் ஆப்கானிஸ்தான் அணி 24.5 ஓவர்களில் 194 ரன்களுக்கு ஆட்டமிழந்தது.
பின்னர் இலக்கை துரத்திய இந்திய அணியில் கேப்டன் ஷுப்மன் கில் 66 பந்துகளில் 84 ரன்கள் எடுத்து இறுதிவரை ஆட்டமிழக்காமல் இருந்தார். இதன் மூலம் இந்திய அணி 13 பந்துகள் மீதமிருக்கையில் 7 விக்கெட்டுகள் வித்தியாசத்தில் வெற்றி பெற்றது.
ஸ்லிப் கேட்ச் முதல் அதிரடி வெற்றி வரை: இந்தியா-ஆப்கானிஸ்தான் ஆட்டத்தில் சுப்மன் கில் நிகழ்த்திய மாயம்!
தனது யூடியூப் சேனலில் பேசிய 48 வயதான வசீம் ஜாபர், குர்னூர் பிரார் ஒரு வலுவான பந்துவீச்சு முறையைக் கொண்டுள்ளார் என்றும், அவர் இளையோர் பிரிவில் அதிக போட்டிகளில் விளையாடவில்லை என்றாலும் அவரது திறமையின் காரணமாகவே முக்கிய இடத்திற்கு விரைவாக நகர்த்தப்பட்டுள்ளார் என்றும் குறிப்பிட்டார்.
“அவரது வேகம் மற்றும் உயரம் காரணமாகவே அவர் விரைவாக அணியில் சேர்க்கப்பட்டுள்ளார். அவர் 144-145 கிமீ வேகத்தில் பந்துவீசுகிறார், அத்துடன் கூடுதல் பவுன்ஸும் பெறுகிறார். அவரிடம் மிகவும் வலுவான பந்துவீச்சு முறை உள்ளது. அவர் ஜூனியர் கிரிக்கெட்டில் அதிகம் விளையாடியதில்லை என்றாலும், அதிக போட்டிகளில் விளையாட விளையாட அவர் மேலும் சிறந்து விளங்குவார். தனது திறமையை நிரூபித்ததன் மூலம் அவர் முன்னிலைக்கு வந்துள்ளார்” என்று ஜாபர் கூறினார்.
மேலும் பேசிய அவர், “அவர் தனது முதல் போட்டியிலேயே ஏமாற்றமளிக்காமல் சிறப்பாக செயல்பட்டார். அவரது பந்துவீச்சு வேகம், லைன் மற்றும் லென்த் ஆகியவை மிகவும் நம்பிக்கையளிக்கும் வகையில் உள்ளன. அவர் இந்திய கிரிக்கெட்டின் மிகச் சிறந்த எதிர்காலமாகத் தெரிகிறார்” என்றார். பஞ்சாப்பைச் சேர்ந்த குர்னூர் பிரார் இதுவரை 10 லிஸ்ட்-ஏ போட்டிகளில் விளையாடி 15 விக்கெட்டுகளை வீழ்த்தியுள்ளார். அவரது சிறந்த பந்துவீச்சு 4/57 ஆகும்.
குர்னூர் பிராரின் திறமை குறித்து ஐபிஎல் தொடரில் பஞ்சாப் கிங்ஸ் (PBKS) அணியில் அவருடன் இணைந்து பணியாற்றிய அனுபவத்தையும் ஜாபர் பகிர்ந்து கொண்டார். ஐபிஎல் தொடரில் அவருக்கு அதிக வாய்ப்புகள் கிடைக்கவில்லை என்றாலும், டெஸ்ட் மற்றும் ஒருநாள் போட்டிகளில் இந்தியாவின் முக்கிய வீரராக உருவெடுக்க அவருக்கு தகுதி உள்ளதாக ஜாபர் குறிப்பிட்டார்.
இது குறித்து பேசிய வசீம் ஜாபர் , “அவருடன் பஞ்சாப் அணியில் நான் பணியாற்றியதால், எனக்கு அவரைப் பற்றி ஏற்கனவே தெரியும். 2024 ஐபிஎல் சீசனில் விளையாடிய அவர், அதன் பிறகு குஜராத் டைட்டன்ஸ் அணிக்குச் சென்றார். ஐபிஎல் போட்டிகளில் அவருக்குப் போதிய வாய்ப்புகள் கிடைக்கவில்லை என்றாலும், அவரது அசாதாரணத் திறமையின் காரணமாகவே அவரைப் பற்றி பேசப்படுகிறது. எதிர்காலத்தில் அவர் இந்திய அணிக்காக டெஸ்ட் மற்றும் ஒருநாள் போட்டிகளில் சிறப்பாகச் செயல்படக் கூடிய ஒரு முக்கியமான வீரராக உருவெடுப்பார்” என்றார்.
IND Vs AFG: அம்மா தான் எல்லாம்.. செய்தியாளர் சந்திப்பை தாய் போனுக்காக நிறுத்திய நிதிஷ் குமார் ரெட்டி
இந்தியா மற்றும் ஆப்கானிஸ்தான் அணிகளுக்கு இடையிலான இரண்டாவது ஒருநாள் போட்டி ஜூன் 17 புதன்கிழமை அன்று லக்னோவில் நடைபெற உள்ளது. இப்போட்டியில் குர்னூர் பிரார் மீண்டும் தனது திறமையை நிரூபிக்க களமிறங்குவார்.
