நியூயார்க்: 2026 ஃபிஃபா உலகக் கோப்பையின் தனது முதல் ஆட்டத்தில் மொராக்கோவிற்கு எதிராக 1-1 என்ற கணக்கில் பிரேசில் அணி டிராவைக் கண்டுள்ள நிலையில், அணியின் பயிற்சியாளர் கார்லோ அன்செலோட்டி தனது கருத்துக்களைப் பகிர்ந்துள்ளார். நியூயார்க் நியூ ஜெர்சி மைதானத்தில் நடைபெற்ற குரூப் சி பிரிவின் இந்த ஆட்டத்தில், ஆப்பிரிக்க சாம்பியனான மொராக்கோ அணிக்கு எதிராக 5 முறை சாம்பியனான பிரேசில் அணி தொடக்கத்தில் தடுமாறியது.
போட்டிக்குப் பின்னர் செய்தியாளர்களிடம் பேசிய அன்செலோட்டி, ஆட்டத்தின் தொடக்கக் கட்டங்களில் தனது வீரர்கள் பதற்றமடைந்திருந்ததாகவும், அவர்கள் எதிர்பார்த்த அளவுக்கு சிறப்பாக விளையாடவில்லை என்றும் ஒப்புக்கொண்டார். இருப்பினும், உலகக் கோப்பையை முதல் போட்டியிலேயே வென்றுவிட முடியாது என்றும், தொடர் முன்னேற முன்னேற தனது அணி சிறப்பான ஆட்டத்தை வெளிப்படுத்தும் என்றும் அவர் உறுதியுடன் தெரிவித்தார்.
"இது ஒரு கடினமான போட்டியாக அமைந்தது, குறிப்பாக ஆட்டத்தின் ஆரம்பத்தில். அணி சற்றே கவலையுடனும் பதற்றத்துடனும் காணப்பட்டதாக நான் நினைக்கிறேன். நாங்கள் சிறப்பாக விளையாடவில்லை என்றாலும், இதற்காக மனதைத் தளரவிடக் கூடாது. இது உலகக் கோப்பையின் முதல் போட்டி, எனவே ஆரம்பத்திலிருந்தே அணி கச்சிதமாகச் செயல்படும் என்று நாம் எதிர்பார்க்க முடியாது. இந்த முடிவு மோசமானது அல்ல, இரண்டாவது போட்டியில் இருந்து எங்கள் முன்னேற்றம் தொடரும். முதல் போட்டியை வைத்து யாரும் உலகக் கோப்பையை வெல்வதில்லை" என்று அன்செலோட்டி கூறினார்.
IND Vs AFG: அம்மா தான் எல்லாம்.. செய்தியாளர் சந்திப்பை தாய் போனுக்காக நிறுத்திய நிதிஷ் குமார் ரெட்டி
நியூ ஜெர்சியில் நடைபெற்ற இந்த குரூப் சி மோதலில் மொராக்கோ அணியுடன் 1-1 என டிராவில் முடித்ததன் மூலம், உலகக் கோப்பை அரங்கில் பிரேசில் அணி வைத்திருந்த நீண்ட கால வரலாற்று சாதனை முடிவுக்கு வந்துள்ளது. உலகக் கோப்பை வரலாற்றில் கடந்த 92 ஆண்டுகளாக தங்களது தொடக்க ஆட்டத்தில் தொடர்ந்து வெற்றி பெற்று வந்த பிரேசிலின் அசைக்க முடியாத ஓட்டத்தை மொராக்கோ அணி முறியடித்தது.
ஆப்பிரிக்க சாம்பியனான மொராக்கோ அணிக்கு எதிரான தொடக்க நிமிடங்களில் கார்லோ அன்செலோட்டியின் பிரேசில் அணி கடுமையாகப் போராடியது. ஆட்டத்தின் 21-வது நிமிடத்தில் பிராஹிம் டயஸ் கொடுத்த அருமையான பாஸைப் பெற்று, இஸ்மாயில் சைபாரி பந்தை அற்புதமாகத் தூக்கி அடித்து (lob) கோல்கீப்பர் அலிசனைத் தாண்டி பிரேசிலின் கோல் வலைக்குள் செலுத்தினார். இதனால் மொராக்கோ 1-0 என முன்னிலை பெற்றது.
இருப்பினும், பிரேசில் அணி விரைவாக பதிலடி கொடுத்தது. 32-வது நிமிடத்தில், ரியல் மாட்ரிட் நட்சத்திர வீரரான வினிசியஸ் ஜூனியர் இடது புறத்தில் இருந்து பந்தைக் கடத்தி வந்து, பந்தை கோலின் மேல் மூலைக்கு உந்தித் தள்ளினார். இதனால் ஸ்கோர் 1-1 என சமநிலையை எட்டியது. இரண்டாவது பாதியில் இரு அணிகளும் தற்காப்பு ஆட்டத்தை பலப்படுத்தியதால், போட்டி டிராவில் முடிந்தது.
தென் அமெரிக்க தகுதிச் சுற்றில் ஐந்தாவது இடத்தைப் பிடித்த பிரேசில், இம்முறை உலகக் கோப்பையை வெல்லும் முன்னணி அணிகளில் ஒன்றாகக் கருதப்படவில்லை. மொராக்கோ அணிக்கு எதிரான இந்த ஆட்டமும் அதை உறுதிப்படுத்துவது போல் அமைந்தது. பிரேசில் அணியினர் மொராக்கோ வீரர்களை விட வேகம் குறைந்தவர்களாகவும், சோர்வடைந்தவர்களாகவும் ஆட்டத்தின் முதல் பாதியில் காட்சியளித்தனர்.
IND Vs AFG: 148 கிமீ வேகம், 6.5 அடி உயரம்: குர்னூர் பிரார் அசாத்திய திறமையை பாராட்டிய வசீம் ஜாபர்!
இருப்பினும், அன்செலோட்டி போன்ற உலகின் மிகச்சிறந்த பயிற்சியாளரும், உலகத்தரம் வாய்ந்த வீரர்களும் பிரேசில் அணியில் உள்ளனர் என்பதால் வரும் போட்டிகளில் அவர்கள் மீண்டு வருவார்கள் என எதிர்பார்க்கப்படுகிறது. பிரேசில் அணி தனது அடுத்த போட்டியில் ஜூன் 19 அன்று கத்துக்குட்டி அணியான ஹைட்டியை எதிர்கொள்ளத் தயாராகி வருகிறது.
