மும்பை: ராஜஸ்தான் ராயல்ஸ் அணிக்கு எதிராக லக்னோ சூப்பர் ஜெயண்ட்ஸ் பந்துவீச்சாளர் ஆகாஷ் சிங் மோசமாகப் பந்துவீசிய பிறகு, முன்னாள் இந்திய கேப்டன் சுனில் கவாஸ்கர் அவரது வைரலான பேப்பர் கொண்டாட்டத்தைக் கடுமையாக விமர்சித்துள்ளார். ஜெய்ப்பூரில் நடைபெற்ற அந்த ஆட்டத்தில் ராஜஸ்தான் ராயல்ஸிடம் ஏழு விக்கெட் வித்தியாசத்தில் லக்னோ தோற்றது.
ஆகாஷ், மூன்று ஓவர்களில் ஒரு விக்கெட்டை மட்டும் எடுத்து 54 ரன்களை வாரி வழங்கினார். சில நாட்களுக்கு முன் சிஎஸ்கே-வுக்கு எதிராக அசத்திய அவருக்கு, இது ஒரு மறக்க முடியாத மோசமான ஆட்டமாக அமைந்தது. இந்த சீசனில் சென்னை சூப்பர் கிங்ஸுக்கு எதிரான தனது முதல் ஆட்டத்தில் 3 விக்கெட்டுகளை வீழ்த்தி 26 ரன்கள் மட்டுமே கொடுத்து அசத்திய ஆகாஷ், விக்கெட்டுகளை எடுத்தபோது பாக்கெட்டில் இருந்து ஒரு குறிப்பை வெளியே எடுத்தார்.
அதில், "#அக்கிஆன்ஃபயர்.. டி20 போட்டியில் விக்கெட்டுகளை எப்படி எடுப்பது என்பது ஆகாஷுக்குத் தெரியும்" என எழுதப்பட்டிருந்தது. முன்னாள் அணிக்கு எதிராக நடந்ததால் இது பரவலான கவனத்தைப் பெற்றது. எனினும், இது யாரையும் குறிப்பிட்டு பேச அல்ல என்று ஆகாஷ் விளக்கமளித்தார்.
ஆகாஷ் சிங் பவுண்டரிகளை வாரி வழங்கியபோது, வர்ணனையில் இருந்த சுனில் கவாஸ்கர், "நான் கேட்கிறேன், 'குறிப்புச் சீட்டு இப்போது எங்கே?' அது பாக்கெட்டில் இருக்கும் அல்லவா? நீங்கள் ஒரு ஓவரில் ஆறு பந்துகளை வீசுகிறீர்கள். ஒரு பந்தில் ஒருவேளை விக்கெட் பெறலாம். ஐந்து பந்துகளில் நீங்கள் அடித்து நொறுக்கப்படுகிறீர்கள். அவர் 17 பந்துகளில் 48 ரன்களை விட்டுக்கொடுத்துள்ளார்" என்று நேரடியாக விமர்சித்தார்.
ஐபிஎல் வீரர்களிடம் குறிப்புச் சீட்டுகளைப் பயன்படுத்தி கொண்டாடும் வழக்கம் அபிஷேக் சர்மாவுடன் தொடங்கியது. அவர் தனது சத கொண்டாட்டத்தை சன்ரைசர்ஸ் ஹைதராபாத் ரசிகர்களுக்கான "ஆரஞ்சு படை"க்கு அர்ப்பணித்தார். இதேபோல், இந்த ஆண்டு சென்னை சூப்பர் கிங்ஸ் அணியின் உர்வில் படேல் மற்றும் மும்பை இந்தியன்ஸ் அணியின் ரகு சர்மா ஆகியோரும் இதுபோன்ற "குறிப்பு சீட்டு கொண்டாட்டங்களில்" ஈடுபட்டனர்.
இத்தகைய கொண்டாட்ட பாணியை டேல் ஸ்டெய்ன், அம்பதி ராயுடு, மிட்செல் மெக்லெனகன் உள்ளிட்ட பல முன்னாள் கிரிக்கெட் வீரர்கள் கடுமையாக விமர்சித்துள்ளனர். டேல் ஸ்டெய்ன் தனது எக்ஸ் (X) தளப் பதிவில், "அந்தக் குறிப்புச் சீட்டுகளை தூக்கி எறிய வேண்டிய நேரம் வந்துவிட்டது. அது இனி டிரெண்டிங்கில் இல்லை. உண்மையில், அது ஒருபோதும் டிரெண்டிங்கில் இருந்ததில்லை" என்று பதிவிட்டார்.
IPL 2026: தோனி இல்லனா என்ன? மினி ஹெலிகாப்டர் ஷாட்டை பறக்கவிட்ட உர்வில் பட்டேல்.. கம்மின்ஸ் ஷாக்
அம்பதி ராயுடு தனது விமர்சனத்தில் மிகவும் வெளிப்படையாக, இத்தகைய கொண்டாட்டங்களை தடை செய்ய வேண்டும் என்று வலியுறுத்தினார். "இது வேடிக்கையாகவும், சற்று வெற்றுத்தனமாகவும் இருக்கிறது. இதுபோன்ற குறிப்புச் சீட்டுகளை நான் தடை செய்ய வேண்டும் என்று நினைக்கிறேன், இது அப்பட்டமான முட்டாள்தனம். தேர்வுக்கூடத்திற்கு நீங்கள் குறிப்புச் சீட்டுகளை எடுத்துச் செல்ல அனுமதிக்கப்படுவதில்லை என்று நினைக்கிறேன்" என்றார்.
