சண்டிகர்: முல்லன்பூரில் நடைபெற்று வரும் ஆப்கானிஸ்தானுக்கு எதிரான ஒரே ஒரு டெஸ்ட் போட்டியின் இரண்டாம் நாளில் பிரசித் கிருஷ்ணா அபாரமாக பந்துவீசி ஆப்கானிஸ்தான் தொடக்க ஆட்டக்காரர் செடிகுல்லா அடால் (Sediqullah Atal) விக்கெட்டை வீழ்த்தினார். ரவுண்ட் தி விக்கெட் (Round the wicket) முறையில் அவர் வீசிய அந்தப் பந்து, ஆஃப் ஸ்டம்பிற்கு வெளியே பிட்ச் ஆகி மின்னல் வேகத்தில் உள்ளே வந்தது.
பேட்ஸ்மேனின் தற்காப்பை மீறிச் சென்ற அந்தப் பந்து, ஆஃப் ஸ்டம்பை வேரோடு சாய்த்து காற்றில் பறக்கவிட்டது. 17 ரன்கள் எடுத்திருந்த நிலையில் அடால் ஆட்டமிழந்தார்.இந்த விக்கெட் பிரசித் கிருஷ்ணாவின் டெஸ்ட் கிரிக்கெட் வாழ்க்கையில் ஒரு முக்கிய மைல்கல்லாகும். ஏனெனில், இந்திய மண்ணில் அவர் வீழ்த்திய முதல் டெஸ்ட் விக்கெட் இதுவாகும்.
இதற்கு முன்பு அவர் விளையாடிய டெஸ்ட் போட்டிகள் அனைத்தும் வெளிநாடுகளில் (தென்னாப்பிரிக்கா, ஆஸ்திரேலியா, இங்கிலாந்து) நடைபெற்றவை என்பது குறிப்பிடத்தக்கது. பிரசித் கிருஷ்ணா 2023-ம் ஆண்டு டிசம்பர் மாதம் தென்னாப்பிரிக்காவிற்கு எதிரான செஞ்சூரியன் டெஸ்டில் அறிமுகமானார். 2024-25 பார்டர்-கவாஸ்கர் கோப்பை தொடரில், சிட்னி டெஸ்டில் ஜஸ்பிரித் பும்ராவிற்குப் பதிலாகக் களமிறங்கிய அவர், ஆஸ்திரேலியாவிற்கு எதிராக 6 விக்கெட்டுகளை வீழ்த்தி அசத்தினார்.
வைபவ் சூர்யவன்ஷி தேர்வு செய்வது காலத்தின் கட்டாயம்.. இனி அவர் தான் எதிர்காலம்- அஜித் அகர்கர் கருத்து
2021-ல் இங்கிலாந்துக்கு எதிரான தனது அறிமுக ஒருநாள் போட்டியிலேயே 4 விக்கெட்டுகளை (4/54) வீழ்த்தினார். இதன் மூலம் அறிமுக ஒருநாள் போட்டியில் அதிக விக்கெட் வீழ்த்திய இந்திய வீரர் என்ற 24 ஆண்டுகால சாதனையை அவர் முறியடித்தார். கர்நாடக மாநிலத்தைச் சேர்ந்த இவர், 2015-ல் வங்கதேச ஏ அணிக்கு எதிரான தனது முதல் தர கிரிக்கெட் அறிமுகப் போட்டியிலேயே 5 விக்கெட்டுகளை வீழ்த்தி அனைவரது கவனத்தையும் ஈர்த்தார்.
IND vs AFG: அடுத்த ஸ்டார் கிடைச்சிட்டாரு! அறிமுக போட்டியில் முதல் ஓவரிலே மானவ் சுதர் விக்கெட் வீழ்த்தி அபாரம்
உயரமான வேகப்பந்து வீச்சாளரான பிரசித் கிருஷ்ணா, பந்தை பிட்ச் செய்து எக்ஸ்ட்ரா பவுன்ஸ் (Extra bounce) மற்றும் வேகம் (Skid) கொடுப்பதில் வல்லவர். காயங்களால் சில காலம் பாதிக்கப்பட்டிருந்தாலும், தற்போது இந்திய டெஸ்ட் அணியின் முக்கிய வேகப்பந்து வீச்சாளராக உருவெடுத்துள்ளார்.
