ஹைதராபாத்: 2026 ஐபிஎல் கிரிக்கெட் தொடரின் லீக் ஆட்டத்தில், ராயல் சேலஞ்சர்ஸ் பெங்களூரு அணியின் பந்துவீச்சை நாலாபுறமும் சிதறடித்த சன்ரைசர்ஸ் ஹைதராபாத் அணி 20 ஓவர்களில் 255 ரன்கள் குவித்து மலைக்க வைத்துள்ளது. சன்ரைசர்ஸ் ஹைதராபாத் பேட்ஸ்மேன்களின் அதிரடியால் ஆர்சிபி பந்துவீச்சாளர்கள் மைதானத்திலேயே நிலைகுலைந்து போயினர்.
ஹைதராபாத் ராஜீவ் காந்தி மைதானத்தில் நடைபெற்ற இந்தப் போட்டியில் டாஸ் வென்ற ஹைதராபாத் கேப்டன் பேட் கம்மின்ஸ் முதலில் பேட்டிங்கை தேர்வு செய்தார். ஆடுகளம் பேட்டிங்கிற்கு சாதகமாக இருந்ததை சரியாகப் பயன்படுத்திக் கொண்ட தொடக்க வீரர்கள் அபிஷேக் சர்மா மற்றும் டிராவிஸ் ஹெட் ஜோடி ஆரம்பம் முதலே சிக்ஸர் மழையைப் பொழிந்தது. குறிப்பாக அபிஷேக் சர்மா வெறும் 22 பந்துகளில் 5 சிக்ஸர்கள் மற்றும் 4 பவுண்டரிகளுடன் 56 ரன்கள் குவித்து அதிரடி காட்டினார்.
அபிஷேக் சர்மா ஆட்டமிழந்த பிறகு ஜோடி சேர்ந்த இஷான் கிஷன் மற்றும் ஹென்ரிச் கிளாசன் இருவரும் ஆர்சிபி பந்துவீச்சைத் தவிடுபொடியாக்கியது. மைதானத்தின் மூலை முடுக்கெல்லாம் பந்துகளைப் பறக்கவிட்ட இந்த ஜோடி, 3-வது விக்கெட்டுக்கு 48 பந்துகளில் 113 ரன்களைச் சேர்த்தது. அதிரடியாக ஆடிய இஷான் கிஷன் 46 பந்துகளில் 79 ரன்கள் (8 பவுண்டரி, 3 சிக்ஸர்) விளாசினார். மறுபுறம் கிளாசன் தனது பாணியில் சிக்ஸர்களைப் பறக்கவிட்டு 24 பந்துகளில் 51 ரன்கள் சேர்த்தார்.
ஆர்சிபி அணியின் நட்சத்திர பந்துவீச்சாளர்களான புவனேஸ்வர் குமார் மற்றும் ஜோஷ் ஹேசில்வுட் ஆகியோரின் பந்துவீச்சை சன்ரைசர்ஸ் ஹைதராபாத் அணியின் பேட்ஸ்மேன்கள் துவம்சம் செய்தனர். புவனேஸ்வர் குமார் 4 ஓவர்களில் விக்கெட் ஏதுமின்றி 51 ரன்களையும், ஹேசில்வுட் 55 ரன்களையும் வாரி வழங்கினர். ரசிக் சலாம் 2 விக்கெட்டுகளை வீழ்த்தினாலும் 4 ஓவர்களில் 52 ரன்கள் கொடுத்தார். ஆர்சிபி அணியின் அனைத்து பந்துவீச்சாளர்களும் 12-க்கும் அதிகமான எகானமி ரேட்டில் ரன்களைக் கொடுத்தது அந்த அணிக்கு பெரும் பின்னடைவாக அமைந்தது.
கடைசி நேரத்தில் நிதிஷ் குமார் ரெட்டி 12 பந்துகளில் 29 ரன்கள் எடுக்க, ஹைதராபாத் அணி 20 ஓவர்கள் முடிவில் 4 விக்கெட் இழப்புக்கு 255 ரன்கள் என்ற பிரம்மாண்ட ஸ்கோரை எட்டியது. 256 ரன்கள் எடுத்தால் வெற்றி என்ற இமாலய இலக்கை நோக்கி பெங்களூரு அணி அடுத்து ஆடியது.
