தர்மசாலா: ஆப்கானிஸ்தானுக்கு எதிரான முதலாவது ஒருநாள் போட்டியில் ரோஹித் சர்மா மற்றும் சுப்மன் கில் இடையே ஏற்பட்ட துரதிர்ஷ்டவசமான ரன்-அவுட்டின் போது, கிரிக்கெட்டின் அடிப்படை மற்றும் பொது அறிவு இல்லாததே காரணம் என்று இந்திய அணியின் அனுபவமிக்க சுழற்பந்து வீச்சாளர் ரவிச்சந்திரன் அஸ்வின் வருத்தம் தெரிவித்துள்ளார்.
தர்மசாலாவில் உள்ள எச்பிசிஏ (HPCA) மைதானத்தில் நடைபெற்ற இந்த ஆட்டத்தின் இரண்டாவது இன்னிங்ஸில், இந்திய அணியின் தொடக்க ஜோடிக்கு இடையே ஏற்பட்ட பெரும் குழப்பம் ரன்-அவுட்டில் முடிந்தது. இந்திய அணியின் ரன் சேசிங்கின் போது ஆறாவது ஓவரில் இந்த சம்பவம் நிகழ்ந்தது. ரோஹித் சர்மா பந்தை மிட்-ஆன் திசையில் தட்டிவிட்டு உடனடியாக ரன் எடுக்க ஓடினார்.
ஆனால், நான்-ஸ்ட்ரைக்கர் முனையில் இருந்த சுப்மன் கில் இதற்கு உடன்படவில்லை. பந்தைப் பார்த்துக் கொண்டிருந்த அவர், பந்துவீச்சாளர் அல்லாஹ் கசான்ஃபரின் குறுக்கீட்டினாலும் குழப்பமடைந்தார். ரோஹித் மீண்டும் தனது கிரீஸுக்குள் திரும்புவதற்குள் ரன்-அவுட் செய்யப்பட்டார். அவர் டைவ் அடித்தும் பலனளிக்காமல், 16 ரன்களுக்கு ஆட்டமிழக்க நேரிட்டது.
இந்தச் சம்பவத்தில் யாரையும் தனிப்பட்ட முறையில் விரல் நீட்டி குற்றம் சாட்ட விரும்பவில்லை என்று கூறிய அஸ்வின், ஸ்ட்ரைக்கரின் அழைப்பு என்பதால் இதில் ரோஹித் மீது எந்தத் தவறும் இல்லை என்று சுட்டிக்காட்டினார். இது குறித்து தனது யூடியூப் சேனலில் பேசிய அவர், "விக்கெட்டுக்கு முன்னால் பந்தை அடித்து விளையாடும் போது, அது ஸ்ட்ரைக்கரின் அழைப்பு (Striker's call) என்பதை நான்-ஸ்ட்ரைக்கர் ஏற்க வேண்டும்.
29 பந்துகளில் சதம் விளாசிய சாஹல்.. 17 சிக்சர்கள் விளாசல்.. பீட்டர்சன் சவாலை ஏற்று அசத்தல்
இதை ரசிகர்கள் எப்போது புரிந்து கொள்வார்கள் என்று தெரியவில்லை. விவாதிப்பது எளிது, ஆனால் கில் ரன் ஓட மறுத்துவிட்டார். இவர்களுக்கிடையில் நடக்கும் முதல் ரன்-அவுட் இதுவல்ல" என்று கூறினார்."ஸ்ட்ரைக்கர் ரன் ஓடலாம் என்று சொன்னால், அங்கு 'வேண்டாம்' என்று சொல்வதற்கு இடமே இல்லை. விக்கெட்டுகளுக்கு இடையே ஓடுவது பற்றிய இந்த அடிப்படைகள் அனைத்தும் சிறுவயதிலேயே கற்றுத்தரப்படுகின்றன. இவை அனைத்தும் மிகவும் சாதாரண விஷயங்கள். எல்லோரும் தவறு செய்கிறார்கள், நான் இங்கு ஒருவரை மட்டும் குற்றம் சொல்லவில்லை, ஆனால் உண்மை என்னவென்றால், இதில் ரோஹித் சர்மாவின் தவறு எதுவுமே இல்லை" என்று அஸ்வின் தெளிவுபடுத்தினார்.
இந்தத் தவறுக்குப் பிறகு சிறப்பாக விளையாடிய சுப்மன் கில், ஆட்டமிழக்காமல் அரைசதம் கடந்து இந்திய அணியை இரண்டு ஓவர்கள் மீதமிருந்த நிலையில் வெற்றிப் பாதைக்கு அழைத்துச் சென்றார். இருப்பினும், ரோஹித் சர்மா மற்றும் சுப்மன் கில் கூட்டணிக்கு இடையே இதுபோன்ற ரன்-அவுட் குழப்பங்கள் ஏற்படுவது இது முதல் முறையல்ல. இதற்கு முன்னதாக 2024 ஆம் ஆண்டின் தொடக்கத்தில் ஆப்கானிஸ்தானுக்கு எதிராக நடைபெற்ற முதலாவது டி20 போட்டியிலும் இதேபோன்ற ஒரு சம்பவம் நிகழ்ந்தது.
இந்திய அணியிலிருந்து ஜடேஜாவை நீக்குவது முட்டாள்தனம்.. ஸ்ரீகாந்த் கருத்து
அன்றைய போட்டியிலும் ரோஹித் சர்மா பந்தை மிட்-ஆஃப் திசையில் அடித்துவிட்டு உடனடியாக ரன் எடுக்க ஓடினார். ஆனால் சுப்மன் கில் பந்தையே பார்த்துக் கொண்டிருந்ததால் கடைசி நேரத்தில் ரன் ஓட மறுத்தார். இதனால் அப்போதைய கேப்டனாக இருந்த ரோஹித் சர்மா ரன் ஏதும் எடுக்காமல் பூஜ்ஜிய ரன்களுக்கு ஆட்டமிழந்து வெளியேற வேண்டியிருந்தது குறிப்பிடத்தக்கது.
