நியூயார்க்: அல்ஜீரியாவிற்கு எதிரான உலகக் கோப்பை போட்டியில் அர்ஜென்டினா அணியின் கேப்டன் லியோனல் மெஸ்ஸி ஹாட்ரிக் கோல் அடித்து அசத்தியுள்ளார். இதனைத் தொடர்ந்து, பிரான்ஸ் அணியின் முன்னாள் தற்காப்பு ஆட்டக்காரரும், 1998 உலகக் கோப்பை வெற்றியாளருமான பிராங்க் லெபோஃப், மெஸ்ஸி இப்போது பிரேசிலின் மாபெரும் கால்பந்து சகாப்தமான பீலேக்கு சமமான நிலைக்கு உயர்ந்துள்ளார் என்று பாராட்டியுள்ளார்.
செவ்வாய்க்கிழமை (ஜூன் 16) நடைபெற்ற இப்போட்டியில் அல்ஜீரியாவை 3-0 என்ற கோல் கணக்கில் வீழ்த்தி அர்ஜென்டினா எளிதான வெற்றியைப் பதிவு செய்தது. இதன் மூலம் ஆறு உலகக் கோப்பை தொடர்களில் விளையாடிய முதல் வீரர் என்ற வரலாற்றுச் சாதனையை மெஸ்ஸி படைத்தார். ஆட்டத்தின் 17-வது நிமிடத்தில் பெனால்டி பாக்ஸிற்கு வெளியிலிருந்து இடது காலால் உதைத்து மெஸ்ஸி முதல் கோலை அடித்தார்.
பின்னர் இரண்டாவது பாதியில் மேலும் இரண்டு கோல்களை அடித்து அசத்தினார். இதன் மூலம் உலகக் கோப்பை வரலாற்றில் ஹேட்ரிக் கோல் அடித்த மிக வயதான வீரர் (38 வயது) என்ற பெருமையை அவர் பெற்றார். அத்துடன், உலகக் கோப்பையில் அதிக கோல் அடித்த வீரர்கள் பட்டியலில் முதலிடத்தில் இருக்கும் மிரோஸ்லாவ் குளோசேவின் சாதனையை (16 கோல்கள்) மெஸ்ஸி சமன் செய்துள்ளார்.
ஆட்டத்தின் 76-வது நிமிடத்தில் அவர் மைதானத்தில் இருந்து வெளியேறியபோது, ரசிகர்கள் அனைவரும் எழுந்து நின்று அவருக்கு பெரும் வரவேற்பு அளித்தனர்.மெஸ்ஸியின் இந்த சிறப்பான ஆட்டம் குறித்து ஈஎஸ்பிஎன் பாட்காஸ்டில் (ESPN Podcasts) பேசிய லெபோஃப், "அவர் இப்போது பீலேக்கு சமமாக இருக்கிறார். அவர் ஒரு அசாத்திய மேதை" என்று நெகிழ்ச்சியுடன் குறிப்பிட்டார்.
மெஸ்ஸி இப்போது உலகக் கோப்பை வரலாற்றில் 11 வெவ்வேறு நாடுகளுக்கு எதிராக கோல் அடித்து சாதனை படைத்துள்ளார். உலகக் கோப்பையில் பெனால்டி பாக்ஸிற்கு வெளியிலிருந்து அவர் அடித்த 5-வது கோல் இதுவாகும், இதுவே ஒரு வீரரின் அதிகபட்ச எண்ணிக்கையாகும். மேலும், உலகக் கோப்பை தொடரில் தொடர்ந்து 5 ஆட்டங்களில் கோல் அடித்து, வரலாற்றில் இரண்டாவது மிக நீண்ட கோல் வேட்டை சாதனையை அவர் நீடித்துள்ளார்.
மறுபுறம், பீலே மூன்று உலகக் கோப்பைகளை வென்றுள்ளார், மேலும் உலகக் கோப்பையின் இறுதிப் போட்டியில் (1958) கோல் அடித்த மிக இளைய வீரர் என்ற பெருமையைப் பெற்றவர் ஆவார். அவர் 14 போட்டிகளில் 12 கோல்களை அடித்து, அதிக கோல் அடித்தவர்கள் பட்டியலில் ஐந்தாவது இடத்தில் உள்ளார்.
2026 உலகக் கோப்பையில் முதல் ஹேட்ரிக் கோல் அடித்து அசத்திய லியோனல் மெஸ்ஸியை, ஸ்வீடன் அணியின் முன்னாள் நட்சத்திர ஸ்ட்ரைக்கர் ஸ்லாடன் இப்ராஹிமோவிச்சும் வெகுவாகப் பாராட்டியுள்ளார். நான்கு ஆண்டுகளுக்கு முன்பே மெஸ்ஸி உலகக் கோப்பையை வென்றிருந்தாலும், அவர் எல்லா காலத்திலும் சிறந்த வீரர் என்பதில் தமக்கு எந்த மாற்றுக்கருத்தும் இல்லை என்று இப்ராஹிமோவிச் ஒப்புக்கொண்டுள்ளார்.
"நான் ஏன் மெஸ்ஸியை இவ்வளவு நேசிக்கிறேன்? அவரது ஆட்டம் மிகவும் இயல்பானது, அவருக்காகவே இந்த விளையாட்டு உருவாக்கப்பட்டது போல இருக்கும். அவர் தொடுவதெல்லாம் பொன்னாகிறது, அவருக்காக உயிரைக் கொடுக்கவும் தயாராக இருக்கும் ஒரு அணி அவருடன் இருக்கிறது. அவர் உலகக் கோப்பையை வெல்வது, அவர் வரலாற்றின் மிகச்சிறந்த வீரர் என்ற தகுதியை மாற்றப் போவதில்லை" என்று இப்ராஹிமோவிச் தெரிவித்துள்ளார்.
FIFA: போர்ச்சுகல் அணிக்கு சுமையாக மாறிவிட்டார் கிறிஸ்டியானோ ரொனால்டோ.. கால்பந்து வல்லுனர் தாக்கு
தங்களது உலகக் கோப்பை பட்டத்தைத் தக்கவைக்கும் பயணத்தை அர்ஜென்டினா வெற்றிகரமாகத் தொடங்கியுள்ளது. இதன் மூலம் கடந்த 60 ஆண்டுகளில் இல்லாத வகையில், தொடர்ந்து இரண்டாவது முறையாக உலகக் கோப்பையை வென்ற முதல் அணி என்ற சாதனையை நோக்கி மெஸ்ஸி தலைமையிலான அணி முன்னேறி வருகிறது. இதற்கு முன்னர் இத்தாலி (1938) மற்றும் பிரேசில் (1962) ஆகிய நாடுகள் மட்டுமே இந்த அரிய சாதனையை ஒட்டுமொத்தமாக நிகழ்த்தியுள்ளன.
