கொல்கத்தா: 2026 ஐபிஎல் தொடரில் கொல்கத்தா நைட் ரைடர்ஸ் அணிக்கு எதிரான போட்டியில், மும்பை இந்தியன்ஸ் வீரர் திலக் வர்மா ஆடிய மிக மந்தமான ஆட்டம் 14 ஆண்டு கால ஐபிஎல் வரலாற்றில் ஒரு மோசமான சாதனையாகப் பதிவாகியுள்ளது. டி20 கிரிக்கெட்டில் அதிரடியாக ஆட வேண்டிய கட்டாயத்தில் இருந்தும், டெஸ்ட் போட்டியை விட மெதுவாக அவர் ரன் சேர்த்தது மும்பை அணியின் தோல்விக்கு முக்கியக் காரணமாக அமைந்தது.
ஈடன் கார்டன் மைதானத்தில் புதன்கிழமை நடைபெற்ற இந்தப் போட்டியில் முதலில் பேட்டிங் செய்த மும்பை அணி 20 ஓவர்களில் 8 விக்கெட் இழப்புக்கு 147 ரன்கள் மட்டுமே எடுத்தது. மழையினால் பாதிக்கப்பட்ட இந்த ஆட்டத்தில், ஆடுகளம் பேட்டிங்கிற்குச் சவாலாக இருந்த போதிலும், திலக் வர்மாவின் பேட்டிங் அணுகுமுறை யாராலும் புரிந்துகொள்ள முடியாத ஒன்றாக இருந்தது. 32 பந்துகளைச் சந்தித்த அவர் வெறும் 20 ரன்கள் மட்டுமே எடுத்தார். அவரது ரன் குவிக்கும் வேகம் (Strike Rate) 62.50 ஆக மட்டுமே இருந்தது.
ஐபிஎல் வரலாற்றில் 30 பந்துகளுக்கு மேல் சந்தித்து மிகக் குறைந்த ஸ்ட்ரைக் ரேட் கொண்ட வீரர்கள் பட்டியலில் திலக் வர்மா 9-வது இடத்தைப் பிடித்துள்ளார். கடந்த 14 ஆண்டுகளில் ஒரு வீரர் ஆடிய மிக மெதுவான இன்னிங்ஸ் இதுவே ஆகும். இதற்கு முன்னதாக 2012-ல் மைக்கேல் ஹசி ஆடிய மந்தமான ஆட்டமே சாதனையாக இருந்தது. தற்போது அதனைத் திலக் வர்மா முறியடித்துள்ளார்.
இந்தப் போட்டியில் தனது முதல் பவுண்டரியை அடிக்க திலக் வர்மா 25 பந்துகளை எடுத்துக்கொண்டார். இந்த சீசனில் ஒரு பவுண்டரி அடிக்க அதிக பந்துகளைச் செலவழித்த வீரர் இவர்தான். இந்த வரிசையில் ரவீந்திர ஜடேஜா (24 பந்துகள்) 2-வது இடத்தில் உள்ளார்.
திலக் வர்மா இந்த சீசனில் இதுவரை 356 ரன்கள் சேர்த்திருந்தாலும், சுழற்பந்து வீச்சாளர்களுக்கு எதிராக அவர் தொடர்ந்து தடுமாறி வருகிறார். இந்த ஆண்டு சுழற்பந்து வீச்சாளர்களுக்கு எதிராக 10 இன்னிங்ஸ்களில் வெறும் 103 ரன்கள் மட்டுமே எடுத்துள்ளார். அவரது சராசரி 17 ஆகவும், ஸ்டிரைக் ரேட் மிகக் குறைவாகவும் உள்ளது. குறிப்பாக அவர் சந்தித்த பந்துகளில் 32 சதவீதம் ரன் ஏதும் எடுக்காத 'டாட்' பந்துகள் ஆகும்.
ரோஹித் சர்மா 15 ரன்களும், சூர்யகுமார் யாதவ் 15 ரன்களும் எடுத்து ஆட்டமிழந்த நிலையில், ஹர்திக் பாண்டியா 27 பந்துகளில் 26 ரன்கள் எடுத்தார். மும்பை அணிக்கு இன்னும் ஒரே ஒரு லீக் போட்டி மட்டுமே மீதமுள்ள நிலையில், திலக் வர்மாவின் இந்த மந்தமான ஆட்டம் அந்த அணியின் எதிர்காலத் திட்டங்களைப் பாதிக்கும் என அஞ்சப்படுகிறது.
46.7: கங்குலி (2008)
48.6: தினேஷ் கார்த்திக் (2010)
54.8: மேத்யூ ஹேடன் (2010)
58.1: யுவராஜ் சிங் (2009)
59.4: ஜாக் காலிஸ் (2010)
59.4: மைக்கேல் ஹசி (2012)
61.3: ரிக்கி பாண்டிங் (2008)
61.3: மெக்கல்லம் (2009)
62.5: திலக் வர்மா (2026)
