மும்பை: ஆப்கானிஸ்தான் அணிக்கு எதிராக நடைபெற உள்ள ஒருநாள் கிரிக்கெட் தொடரிலிருந்து காயம் காரணமாக விலகியுள்ள விராட் கோலிக்கு பதிலாக, சென்னை சூப்பர் கிங்ஸ் (சிஎஸ்கே) அணியின் கேப்டன் ருதுராஜ் கெய்க்வாட் இந்திய அணியில் சேர்க்கப்பட உள்ளதாகத் தகவல்கள் வெளியாகியுள்ளன.
2026 ஐபிஎல் இறுதிப்போட்டியில் ராயல் சேலஞ்சர்ஸ் பெங்களூரு அணிக்காக விளையாடியபோது விராட் கோலிக்கு தொடைப் பகுதியில் காயம் ஏற்பட்டது. குஜராத் டைட்டன்ஸ் அணிக்கு எதிரான அந்தப் போட்டியில் அவர் ஆட்டமிழக்காமல் 75 ரன்கள் குவித்து அணியின் வெற்றிக்கு உதவினார். அந்த இறுதிப்போட்டியில் பேட்டிங் செய்யும் போதே கோலிக்கு காயம் ஏற்பட்டது. அப்போதே அவர் வலியுடன் விளையாடினார்.
அதனால் விராட் கோலியை தற்போது 2 வாரங்கள் ஓய்வு எடுக்க பிசிசிஐ அறிவுறுத்தியுள்ளது. 3-வது போட்டிக்கு முன்னதாக அவர் குணமடைய வாய்ப்பு இருந்தாலும், தேவையற்ற ஆபத்தை தவிர்க்க பிசிசிஐ விரும்பவில்லை. இதனால், ஆப்கானிஸ்தான் அணிக்கு எதிரான ஒருநாள் தொடரில் இருந்து அவர் முழுமையாக விலகியுள்ளார். தற்போது டி20 மற்றும் டெஸ்ட் போட்டிகளில் இருந்து ஓய்வு பெற்றுள்ள கோலி, தனது முழு கவனத்தையும் 2027 உலகக் கோப்பை தொடரின் மீது வைத்துள்ளார்.
கோலிக்கு பதிலாக மகாராஷ்டிரா மற்றும் சிஎஸ்கே அணியின் கேப்டனான ருதுராஜ் கெய்க்வாட் அணியில் சேர்க்கப்பட உள்ளதாக கூறப்படுகிறது. கடந்த டிசம்பர் மாதம் நடைபெற்ற தென்னாப்பிரிக்காவுக்கு எதிரான ஒருநாள் தொடரில் ருதுராஜ் கடைசியாக விளையாடினார். அந்தத் தொடரின் முதல் போட்டியில் 4 பந்துகளில் 8 ரன்களுக்கு ஆட்டமிழந்த அவர், இரண்டாவது போட்டியில் 83 பந்துகளில் 105 ரன்கள் குவித்து அசத்தினார்.
தற்போது வரை 8 ஒருநாள் இன்னிங்ஸ்களில் விளையாடியுள்ள ருதுராஜ், 28.50 சராசரியுடன் 228 ரன்கள் எடுத்துள்ளார். இதில் அவர் அடித்த ஒரு சதம் மட்டுமே 50 சதவீதத்திற்கும் அதிகமான ரன்களாக உள்ளது. 2027 ஒருநாள் உலகக் கோப்பை அணியில் மாற்றுத் துவக்க வீரராகத் தனது இடத்தை உறுதி செய்ய ருதுராஜுக்கு இந்த உள்நாட்டுத் தொடர் ஒரு மிகச் சிறந்த வாய்ப்பாக அமையப்போகிறது.
ஆர்சிபி அணியில் ஹர்திக் பாண்டியா? ஐபிஎல் முடிந்த மறுநாளே தினேஷ் கார்த்திக்குடன் ரகசிய சந்திப்பு!
இந்தியா மற்றும் ஆப்கானிஸ்தான் அணிகளுக்கு இடையிலான 3 போட்டிகள் கொண்ட ஒருநாள் தொடர் ஜூன் 13, 17 மற்றும் 20 ஆகிய தேதிகளில் முறையே தர்மசாலா, லக்னோ மற்றும் சென்னை ஆகிய நகரங்களில் நடைபெற உள்ளது. ஆப்கானிஸ்தான் தொடரைத் தொடர்ந்து இந்திய அணி அயர்லாந்து மற்றும் இங்கிலாந்துக்கு எதிரான தொடர்களில் விளையாட உள்ளது.
