முதலமைச்சர் சி. ஜோசப் விஜய் தலைமையிலான தவெக அரசு, தமிழ்நாட்டின் தற்போதைய பொருளாதாரச் சூழல் மற்றும் ஒட்டுமொத்த கடன் நிலவரம் குறித்த நிதிநிலை வெள்ளை அறிக்கையை (White Paper) அதிகாரப்பூர்வமாக வெளியிட்டுள்ளது. தலைமைச் செயலகத்தில் இந்த அறிக்கையை வெளியிட்டுப் பேசிய நிதி அமைச்சர் என். மரிய வில்சன், கடந்த ஐந்து ஆண்டு கால திமுக ஆட்சியில் அரங்கேறிய மிக மோசமான நிதி நிர்வாகச் சீர்கேடுகளைப் புள்ளிவிவரங்களுடன் அக்குவேறாக ஆணிவேறாகப் பட்டியலிட்டார். இந்த வெள்ளை அறிக்கையில் இடம்பெற்றுள்ள விவரங்கள் ஒட்டுமொத்த தமிழக மக்கள் மத்தியிலும் தற்பொழுது பெரும் அதிர்வலைகளை ஏற்படுத்தியுள்ளன.
வெள்ளை அறிக்கையின் மிக முக்கிய மற்றும் அதிர்ச்சியூட்டும் அம்சமாகத் தனிநபர் கடன் சுமை சுட்டிக்காட்டப்பட்டுள்ளது. கடந்த 2020-21 நிதியாண்டில் தமிழ்நாட்டில் ஒரு நபரின் சராசரி கடன் பொறுப்பு 67,087 ரூபாய் என்ற அளவில் இருந்தது. ஆனால், முந்தைய திமுக அரசின் கட்டுப்பாடற்ற கடன் கொள்கைகளால் அது தற்பொழுது 1,28,934 ரூபாயாக உயர்ந்து கிட்டத்தட்ட இரட்டிப்பாகியுள்ளது. இதன் விளைவாக, இன்று தமிழ்நாட்டில் பிறக்கும் ஒவ்வொரு குழந்தையும் மாநிலப் பொருளாதாரத்திற்கு ஒரு பைசா கூடப் பங்களிப்பை வழங்குவதற்கு முன்பாகவே, சுமார் 1.28 லட்சம் ரூபாய் கடன் சுமையோடு பிறக்கும் அவல நிலைக்குத் தள்ளப்பட்டுள்ளது.
மேலும், இந்த வெள்ளை அறிக்கையில் கூறப்பட்டுள்ள 10 முக்கிய அம்சங்கள் பின்வருமாறு பட்டியலிடப்பட்டுள்ளன:
-
பொதுத்துறை நிறுவனங்களின் கடன்களையும் சேர்த்தால் தமிழ்நாட்டின் ஒட்டுமொத்த உண்மையான கடன் பொறுப்பு ரூ.13.18 லட்சம் கோடியாக உயர்ந்துள்ளது.
-
கடந்த ஐந்து ஆண்டு கால திமுக ஆட்சியில் மட்டும் ரூ.4.87 லட்சம் கோடி புதிய கடன் மாநிலத்தின் மீது சுமத்தப்பட்டுள்ளது. இது இந்தியாவின் சுதந்திரத்திற்குப் பிறகு கடந்த 60 ஆண்டுகளில் பெற்ற ஒட்டுமொத்த கடனை விட மிக அதிகமாகும்.
-
மாநிலத்தின் நேரடிக் கடன் மட்டும் ரூ.10 லட்சம் கோடியைத் தொட்டுள்ள நிலையில், வருவாய் பற்றாக்குறை ரூ.78,324 கோடியாக அதிகரித்துள்ளது.
-
தமிழக அரசின் ஒட்டுமொத்த வருவாயில் ஒவ்வொரு 1 ரூபாயிலும் 22.8 பைசா முந்தைய கடன்களுக்கான வட்டி கட்டுவதற்கே செலவிடப்படுகிறது; ஆண்டுக்கு வட்டி செலவு மட்டும் ரூ.67,050 கோடியை எட்டியுள்ளது.
-
மாநிலத்தின் மொத்த செலவினங்களில் 64.4 சதவீதம் அளவுக்குக் கட்டாயச் செலவுகளுக்கே (சம்பளம், ஓய்வூதியம் போன்றவை) சென்றுவிடுகிறது.
-
உள்கட்டமைப்பை மேம்படுத்துவதற்கான மூலதனச் செலவு வெறும் ரூ.50,911 கோடியாகக் குறைந்துள்ளது. அதாவது சொத்துக்களை உருவாக்காமல் அன்றாடச் செலவுகளுக்கே கடன் வாங்கப்பட்டுள்ளது.
-
மின்சாரத் துறையின் மொத்தக் கடன் சுமை ரூ.2.47 லட்சம் கோடியாக உயர்ந்துள்ளதோடு, மின் வாரியத்தின் நஷ்டம் மட்டும் ரூ.1.82 லட்சம் கோடியைத் தாண்டியுள்ளது.
-
அரசுப் போக்குவரத்துக் கழகங்கள் ரூ.72,667 கோடி இழப்பைச் சந்தித்துள்ளன; பேருந்துகளின் ஒரு கிலோமீட்டர் இயக்கத்திற்கு ரூ.78.81 செலவாகும் நிலையில், வருவாய் வெறும் ரூ.25.97 மட்டுமே கிடைக்கிறது.
-
கனிம வளத்துறை மற்றும் சொத்துப் பதிவுகளில் நடந்த முறேகடுகளால் அரசுக்கு மிகப்பெரிய அளவில் வருவாய் இழப்பு ஏற்பட்டுள்ளது.
-
மாநிலத்தின் மொத்த உள்நாட்டு உற்பத்தி (GSDP) 10 சதவீதத்தில் இருந்து 8.32 சதவீதமாகச் சரிந்துள்ளது. மேலும், தமிழ்நாடு ஒரு செல்வந்த மாநிலமாக உருவாவதற்கு முன்பாகவே, முதியவர்கள் அதிகம் வாழும் மாநிலமாக மாறும் மக்கள் தொகையியல் அபாயத்தைச் சந்தித்து வருகிறது.
இனி வரும் நாட்கள் மிகவும் சவாலானவை என்று குறிப்பிட்டுள்ள நிதியமைச்சர் மரிய வில்சன், இவ்வளவு பெரிய நிதி நெருக்கடியிலும் தவெக அரசு தனது மக்கள் நலத்திட்டங்களையும், தேர்தல் வாக்குறுதிகளையும் எவ்வித தடையுமின்றிச் செயல்படுத்த உறுதியாக உள்ளதாகத் தெரிவித்தார். முந்தைய அரசின் ஊழல்களை ஒழிப்பதன் மூலமும், நிர்வாகத் துவாரங்களை அடைத்து நேர்மையான வெளிப்படையான வருவாய் வசூலை 100 சதவீதம் உறுதி செய்வதன் மூலமும் மட்டுமே தமிழ்நாட்டின் இழந்த நிதி நம்பகத்தன்மையை மீண்டும் மீட்டெடுப்போம் என்று அமைச்சர் மரிய வில்சன் தனது உரையில் திடமாக உறுதியளித்தார்.
