கொல்கத்தா: 2026 ஐபிஎல் தொடரின் 70-வது லீக் போட்டியில் கொல்கத்தா நைட் ரைடர்ஸ் அணிக்கு எதிராக டெல்லி கேபிடல்ஸ் அணி 203 ரன்கள் குவித்து சவாலான இலக்கை நிர்ணயித்தது. கொல்கத்தா ஈடன் கார்டன் மைதானத்தில் நடைபெற்ற இந்தப் போட்டியில், டாஸ் வென்று முதலில் பந்துவீச்சைத் தேர்வு செய்த கொல்கத்தா அணியின் முடிவை டெல்லி பேட்டர்கள் தவிடுபொடியாக்கினர்.
டெல்லி அணியின் தொடக்க வீரராக களம் இறங்கிய அபிஷேக் போரல் 22 ரன்களில் ஆட்டமிழந்தார். ஆனால், மற்றொரு தொடக்க வீரரான கே.எல். ராகுல் மைதானத்தின் நாலாபுறமும் பந்துகளை சிதறடித்தார். மிகச்சிறப்பான ஆட்டத்தை வெளிப்படுத்திய ராகுல், வெறும் 30 பந்துகளில் 5 பவுண்டரிகள் மற்றும் 4 சிக்ஸர்களுடன் 60 ரன்களை விளாசினார். இவரது அதிரடியான ஆட்டத்தால் டெல்லி அணி பவர்பிளே முடிவில் 53 ரன்களை எட்டியது.
ராகுலுக்குப் பின் வந்த சாஹில் பராக் 24 ரன்கள் எடுத்தார். கேப்டன் அக்சர் படேல் தனது பங்கிற்கு 25 பந்துகளில் 39 ரன்கள் சேர்த்து அணியின் ஸ்காரை உயர்த்தினார். இறுதி ஓவர்களில் அதிரடி காட்டிய டேவிட் மில்லர் 3 சிக்ஸர்களுடன் 28 ரன்களும், அசுதோஷ் சர்மா 11 பந்துகளில் 18 ரன்களும் எடுக்க, டெல்லி அணி 20 ஓவர்கள் முடிவில் 5 விக்கெட் இழப்பிற்கு 203 ரன்கள் என்ற இமாலய இலக்கை எட்டியது.
IPL 2026: ஆர்சிபி அணி கோப்பை வென்று இவ்ளோ வெற்றிகளைப் பெறக் காரணமே இந்த 2 பேர்தான்!
கொல்கத்தா அணியின் பந்துவீச்சைப் பொறுத்தவரை, சௌரப் துபே மட்டுமே கட்டுக்கோப்பாகப் பந்துவீசினார். அவர் 4 ஓவர்களில் 28 ரன்கள் மட்டுமே விட்டுக்கொடுத்து 2 விக்கெட்டுகளைக் கைப்பற்றினார். நட்சத்திர சுழற்பந்து வீச்சாளர்களான சுனில் நரைன் மற்றும் வருண் சக்கரவர்த்தி தலா 1 விக்கெட்டை வீழ்த்தினாலும், அவர்கள் ஓவர்களில் டெல்லி வீரர்கள் ரன்களைக் குவிக்கத் தவறவில்லை. குறிப்பாக கார்த்திக் தியாகி வீசிய 4 ஓவர்களில் டெல்லி பேட்டர்கள் 55 ரன்களை வாரிச் சுருட்டினர். அனுகுல் ராய் 2 ஓவர்களில் 23 ரன்கள் கொடுத்து 1 விக்கெட்டைப் பெற்றார்.
