சண்டிகர்: ஆப்கானிஸ்தானுக்கு எதிரான டெஸ்ட் போட்டியின் முதல் நாளில், இந்திய வீரர் கே.எல். ராகுலின் நடிப்பு காரணமாக அவர் விக்கெட்டில் இருந்து தப்பிய நிகழ்வு சமூக வலைதளங்களில் ரசிகர்கள் மத்தியில் பேசுபொருளாக மாறியது. மேலும், அதை பயன்படுத்தி அவர் சதம் அடித்தார்.
இந்தப் போட்டியின் 11-வது ஓவரின் முதல் பந்தை ஆப்கானிஸ்தானின் ஜியாவுர் ரஹ்மான் ஷரிஃபி வீசினார். அப்போது கே.எல். ராகுல் அடித்த ஷாட்டில் பந்து அவரது பேட்டில் உரசிய சத்தம் தெளிவாகக் கேட்டது. ஆப்கானிஸ்தான் வீரர்கள் விக்கெட் கேட்டு முறையிட்டும், கள நடுவர் அவுட் தர மறுத்தார். இதனால் ஆப்கானிஸ்தான் அணி ரிவியூ எடுக்கலாமா என்று யோசித்தது.
அப்போது, பந்து தனது பேட்டில் படவே இல்லை என்பது போல கே.எல். ராகுல் மிகவும் அமைதியாகத் தலையசைத்து நடித்தார். விக்கெட் கீப்பர் அப்சர் ஜசாயும் தனக்கு சத்தம் கேட்கவில்லை என்று கூற, கேப்டன் ஹஷ்மத்துல்லா ஷாகிதி ரிவியூ எடுக்க வேண்டாம் என்று முடிவு செய்தார். ஆனால், ரஹ்மானுல்லா குர்பாஸ் பேட்டில் பந்து பட்ட சத்தம் கேட்டதாகக் கூறி, ரிவியூ எடுக்குமாறு கேப்டனை வலியுறுத்திக் கொண்டே இருந்தார்.
சிறிது நேரத்தில் மைதானத்தில் உள்ள பெரிய திரையில் ரீப்ளே காட்டப்பட்டபோது, அல்ட்ரா-எட்ஜில் பந்து பேட்டில் பட்டதற்கான கோடுகள் தெளிவாகக் காட்டப்பட்டன. இதைப் பார்த்த ஆப்கானிஸ்தான் கேப்டன் தனது தவறை உணர்ந்து வருந்தினார்.
இந்தச் சம்பவத்தைக் கண்டு வர்ணனையில் இருந்த இங்கிலாந்தின் முன்னாள் சுழற்பந்து வீச்சாளர் கிரேம் ஸ்வான் நெகிழ்ந்து பேசினார். அவர் கூறுகையில், "கே.எல். ராகுலுக்கு அவரது நடிப்புக்காக உடனடியாக ஆஸ்கர் விருது வழங்க வேண்டும். ஆப்கானிஸ்தான் கேப்டனும் கீப்பரும் அவரைப் பார்த்தபோது, அவர் இல்லை என்பது போல் தலையசைத்தார், அவர்களும் அதை நம்பிவிட்டனர். ராகுலுக்கு எனது வாழ்த்துகள்" என்று கலகலப்பாகக் கூறினார்.
IND vs AFG: ரிஷப் பண்ட் மைல்கல் சாதனை.. தோனி செய்த அதே டெஸ்ட் போட்டி ரெக்கார்டை செய்தார்
இந்தச் சம்பவத்திற்குப் பிறகு, மற்றொரு துவக்க வீரரான யஷஸ்வி ஜெய்ஸ்வால் 32 பந்துகளில் 24 ரன்கள் எடுத்திருந்தபோது சலீம் சாஃபி பந்துவீச்சில் ஆட்டமிழந்தார். இந்த அதிர்ஷ்டத்தால் தப்பிய கே.எல். ராகுல், தொடர்ந்து சிறப்பாக விளையாடி 165 பந்துகளில் சரியாக 100 ரன்கள் (சதம்) எடுத்து ஆட்டமிழந்தார். ஆரம்பத்திலேயே அவுட் ஆகும் வாய்ப்பிலிருந்து தப்பிய ராகுல், தனது நடிப்புத் திறமையால் தப்பித்து, இறுதியில் சதம் அடித்து அசத்தியுள்ளார் என்பது குறிப்பிடத்தக்கது.
