பட மூலாதாரம், CGTN
(இந்த பக்கம் தொடர்ந்து புதுப்பிக்கப்பட்டு வருகிறது.)
அமெரிக்க அதிபர் டொனால்ட் டிரம்ப், தனது முக்கியமான இரண்டு நாள் பயணத்துக்காக புதன்கிழமை மாலை பெய்ஜிங் வந்தடைந்தார். வியாழன் மற்றும் வெள்ளிக்கிழமைகளில் முக்கிய நிகழ்வுகள் திட்டமிடப்பட்டுள்ளன.
வியாழக்கிழமையன்று பெய்ஜிங்கில் உள்ள 'கிரேட் ஹால் ஆஃப் தி பீப்பிள்' எனும் அரச கட்டடத்தில் சீன அதிபர் ஷி ஜின்பிங்குடனான வரவேற்பு விழா அமெரிக்க அதிபரின் முதல் அதிகாரபூர்வ நிகழ்வாக இருக்கும்.
டிரம்ப் தற்போது அங்கு சென்றடைந்துள்ளார். சீன அதிபர் ஷி ஜின்பிங்குடன் டிரம்ப் கைகுலுக்கினார்.
கிரேட் ஹால் ஆஃப் தி பீப்பிள் என்பது தியானன்மென் சதுக்கத்துக்கு மேற்கே அமைந்துள்ள ஒரு அரசு கட்டடமாகும். இது பிற அரசு சார்ந்த நிகழ்வுகளுக்கும், வெளிநாட்டுத் தலைவர்களை வரவேற்பதற்கும் பயன்படுத்தப்படுகிறது.
இங்கு இரு தலைவர்களுக்கும் இடையே இருதரப்புப் பேச்சுவார்த்தைகள் நடைபெறும். அதனைத் தொடர்ந்து, மாலையில் அரச விருந்துக்கு ஏற்பாடு செய்யப்பட்டுள்ளது.
பட மூலாதாரம், Getty Images
இறக்குமதி வரிகள், தொழில்நுட்பப் போட்டி, இரான் போர் மற்றும் தைவான் ஆகியவை குறித்து இரு நாட்டு தலைவர்களும் விவாதிக்கலாம் என எதிர்பார்க்கப்படுகிறது.
டிரம்பின் தூதுக்குழுவில், டெஸ்லாவின் ஈலோன் மஸ்க் மற்றும் என்விடியாவின் ஜென்சன் ஹுவாங் உள்ளிட்ட பல தொழில்நுட்ப நிறுவனங்களின் தலைமைச் செயல் அதிகாரிகளும் அடங்குவர்.
அதிபர் வாகன அணிவகுப்பில் டிரம்ப் வந்தடைந்தபோது, பிராஸ் பேண்ட் இசைக்குழுவுடன் வரவேற்பு அளிக்கப்பட்டது. மக்கள் டிரம்பை முழக்கமிட்டு வரவேற்றனர்.
அங்கு அமெரிக்க மற்றும் சீனக் கொடிகளும் ஏற்றப்பட்டன. இது, முக்கியமான இரண்டு நாள் சந்திப்புக்கு முன்னதாக ஒற்றுமையின் வெளிப்பாடாகக் கருதப்படுகிறது.
பட மூலாதாரம், Getty Images
அதிபர் டிரம்ப் மற்றும் அவரது தூதுக்குழுவினரை வரவேற்க சிவப்பு கம்பளம் விரிக்கப்பட்டிருந்தது.
ஏர் ஃபோர்ஸ் ஒன் விமானத்திலிருந்து டிரம்ப் இறங்கிய பிறகு, அவரை வரவேற்பதற்காக துணை அதிபர் ஹான் ஜெங் ஓடுபாதையில் இருந்தார்.
ஹான் ஜெங் சீனாவின் உயர்மட்டத் தலைவர்களில் ஒருவர் என்பதால், அவரை வரவேற்க அனுப்புவது, பெய்ஜிங் டிரம்புக்குக் காட்டும் மரியாதையின் அடையாளமாகக் கருதப்படுகிறது.
முன்னதாக, 2017 பயணத்தின்போது, டிரம்பை வரவேற்பதற்காக சீனா ஒப்பீட்டளவில் கீழ்நிலைத் தலைவரான, அரசு ஆலோசகர் யாங் ஜியேச்சியை அனுப்பியிருந்தது.
கடந்த ஆண்டு நடைபெற்ற டிரம்பின் பதவியேற்பு விழாவிலும் ஹான் ஜெங் கலந்துகொண்டார்.
டிரம்பின் சீன பயணம் குறித்த மேலும் தகவல்களுக்கு..
டிரம்பின் சீன பயணம் இரு நாடுகளின் உறவுகளை எவ்வாறு மாற்றக்கூடும்?
– இது, பிபிசிக்காக கலெக்டிவ் நியூஸ்ரூம் வெளியீடு
