ரஷ்யாவின் தொடர் ஏவுகணைத் தாக்குதல்களால் நிலைகுலைந்துள்ள உக்ரைன், வான் பாதுகாப்பிற்காக அமெரிக்காவின் அதிநவீன ‘பேட்ரியாட்’ (Patriot Air Defense) ஏவுகணை அமைப்புகளை மட்டுமே நம்பியிருக்கும் நிலையை மாற்ற அதிரடிப் போர்த் திட்டம் ஒன்றை கையில் எடுத்துள்ளது. அமெரிக்கா மற்றும் இஸ்ரேல் நாடுகள் ஈரானுடன் நடத்தி வரும் தீவிர வான்வழி மோதல்களால், சர்வதேச அளவில் அமெரிக்காவின் PAC-3 ரக இடைமறிப்பு ஏவுகணைகளுக்கு (Interceptor Missiles) கடும் பற்றாக்குறை ஏற்பட்டுள்ளது. இதன் காரணமாக, உக்ரைன் அதிபர் வோலோடிமிர் ஜெலென்ஸ்கி, அமெரிக்க அதிபர் டொனால்ட் ட்ரம்பிடம் விடுத்த அவசரக் கோரிக்கைகளுக்குப் பிறகும் போதிய ஏவுகணை விநியோகம் கிடைக்கவில்லை. இந்தச் சூழலைச் சாதகமாக்கிக் கொண்டு ரஷ்யா தனது வான்வழித் தாக்குதல்களைத் தீவிரப்படுத்தியுள்ளதால், அமெரிக்காவுக்கு மாற்றாக பிரிட்டன் மற்றும் ஐரோப்பிய நாடுகளுடன் கைகோர்த்து, உக்ரைன் தனது சொந்த மண்ணிலேயே வான் பாதுகாப்பு ஏவுகணை அமைப்பை உருவாக்கத் தொடங்கியுள்ளது.
பிரிட்டன் தலைநகர் லண்டனில் அந்நாட்டுப் பிரதமர் கீர் ஸ்டார்மர், ஜெர்மனி அதிபர் ஃபிரீட்ரிக் மெர்ஸ், மற்றும் பிரான்ஸ் அதிபர் இம்மானுவேல் மேக்ரான் ஆகியோருடன் உக்ரைன் அதிபர் ஜெலென்ஸ்கி நடத்திய மிக ரகசியமான மற்றும் முக்கியமான ‘E3’ பேச்சுவார்த்தைக்குப் பிறகு இந்த பிரம்மாண்டக் கூட்டணி அதிகாரப்பூர்வமாக உறுதி செய்யப்பட்டுள்ளது. இந்த புதிய பாதுகாப்புத் திட்டத்தின்படி, அமெரிக்காவின் ஒரு பேட்ரியாட் ஏவுகணையின் விலை சுமார் 4 மில்லியன் டாலராக இருக்கும் நிலையில், அதற்குப் பதிலாக மிகக் குறைந்த செலவில், அதிக எண்ணிக்கையில் உற்பத்தி செய்யக்கூடிய ஒரு புதிய “ஐரோப்பிய பேட்ரியாட்” (European Patriot) அமைப்பை உருவாக்கப் போவதாக அறிவிக்கப்பட்டுள்ளது. இத்திட்டத்திற்கு நேட்டோ (NATO) அமைப்பும் முழுமையான ஒருங்கிணைப்பு ஆதரவை வழங்க ஒப்புக்கொண்டுள்ளது.
இந்த பிரம்மாண்ட கூட்டுத் தயாரிப்பில் உக்ரைனின் உள்நாட்டுப் பாதுகாப்புத் தொழிற்துறை மிக முக்கியப் பங்காற்றவுள்ளது. ரஷ்யாவின் அதிவேக ஏவுகணைகளை நடுவானில் தாக்கி அழிக்கும் ‘இடைமறிப்பு ஏவுகணைகளை’ (Interceptor Missiles) உக்ரைன் தனது சொந்த தொழில்நுட்பத்தில் உற்பத்தி செய்யும்; அதற்கான ஆரம்பகட்ட சோதனைகளும் தற்போது வெற்றிகரமாகத் தொடங்கப்பட்டுள்ளன. குறிப்பாக, உக்ரைனின் ‘பயர் பாயிண்ட்’ (Fire Point) என்ற நிறுவனம் ‘ஃபிரேயா’ (Freyja) என்ற திட்டத்தின்கீழ், கூட்டுப் பொருட்களால் (Composite Materials) செய்யப்பட்ட ‘FP-7.x’ என்ற மலிவுவிலை ஏவுகணையைச் சோதித்துள்ளது. இந்த ஏவுகணைகளுடன் பிரிட்டன், பிரான்ஸ், ஜெர்மனி மற்றும் இத்தாலி போன்ற ஐரோப்பிய நாடுகளின் அதிநவீன ரேடார், இலக்கைக் கண்காணிக்கும் தொழில்நுட்பம் (Tracking Systems), மற்றும் வழிகாட்டு அமைப்புகள் (Guidance Systems) ஆகியவை ஒருங்கிணைக்கப்பட உள்ளன.
நான்கு ஆண்டுகளுக்கும் மேலாக ரஷ்யாவுடன் நடந்து வரும் நேரடிப் போரில் உக்ரைன் பெற்றுள்ள விலைமதிப்பற்ற வான் பாதுகாப்பு அனுபவங்களையும், உத்திகளையும் பிரிட்டன் மற்றும் நேட்டோ நாடுகளுடன் உக்ரைன் பகிர்ந்துகொள்ள உள்ளது. இந்த புதிய கூட்டுத் தயாரிப்பு ஏவுகணைகள் வரும் 2027-ஆம் ஆண்டிற்குள் முழுமையான பயன்பாட்டிற்கு வரும் என்று எதிர்பார்க்கப்படுகிறது. இந்த ஏவுகணைத் திட்டம் உக்ரைனுக்கு மட்டுமல்லாமல், எதிர்காலத்தில் ரஷ்யாவின் அச்சுறுத்தலை எதிர்கொள்ளத் தயாராகி வரும் பிரிட்டன் மற்றும் ஒட்டுமொத்த ஐரோப்பிய நாடுகளின் வான் பாதுகாப்புக் கேடயமாகவும் மாறும் என்பதால் சர்வதேச ஆயுதச் சந்தையில் இப்போதே பெரும் பரபரப்பு தொற்றிக்கொண்டுள்ளது.
