பிரிட்டனின் வடக்கு அயர்லாந்தின் தலைநகரான பெல்ஃபாஸ்டில் (Belfast) நேற்று நள்ளிரவு முன்னெப்போதும் இல்லாத வகையில் மிகக் கொடூரமான இனவாத வன்முறை வெறியாட்டம் அரங்கேறியுள்ளது. அகதி அந்தஸ்து கோரி வந்த நபர் ஒருவர் நடத்திய கத்திக் குத்துத் தாக்குதலைத் தொடர்ந்து, ஆத்திரமடைந்த நூற்றுக்கணக்கான வலதுசாரி போராட்டக்காரர்கள் வீதிகளில் இறங்கிப் போர்க்களமாக மாற்றினர். முகமூடி மற்றும் ஹூடி (Hoodie) உடைகளை அணிந்திருந்த வன்முறைக் கும்பல், குடியேறிகள் (Migrants) வசிக்கும் வீடுகளைக் குறிவைத்துத் தங்களின் கோபத்தை வெளிப்படுத்தினர். குறிப்பாக, வரிப்பணத்தில் பராமரிக்கப்படும் வீட்டின் ஜன்னல்களை, தெருவில் இருந்த பெரிய சக்கரக் குப்பைத் தொட்டியை (Wheelie Bin) தூக்கி அடித்து சுக்குநூறாக உடைக்கும் பதைபதைக்கும் காட்சிகள் சமூக வலைத்தளங்களில் வெளியாகிப் பெரும் அதிர்ச்சியை ஏற்படுத்தியுள்ளன.
இந்தக் கலவரத்திற்கு உடனடிப் பின்னணியாக அமைந்தது கடந்த திங்கட்கிழமை இரவு வடக்கு பெல்ஃபாஸ்டில் நடந்த ஒரு கொடூரமான கத்திக் குத்துச் சம்பவமாகும். சூடான் நாட்டைச் சேர்ந்த 30 வயதுடைய புகலிடக் கோரிக்கையாளர் (Asylum Seeker) ஒருவர், 40 வயது மதிக்கத்தக்க உள்ளூர் நபர் ஒருவரைத் தெருவில் போட்டு தலை மற்றும் கழுத்துப் பகுதியில் கத்தியால் கொடூரமாகக் குத்தியுள்ளார். இந்தக் கிராபிக்ஸ் காட்சிகள் இணையத்தில் காட்டுத்தீயாகப் பரவியதைத் தொடர்ந்து, பிரிட்டன் எங்கும் குடியேற்றக் கொள்கைகளுக்கு எதிராகக் கடுமையான அதிருப்தி அலை உருவானது. இதனைத் தொடர்ந்து, எக்ஸ் (X) தளத்தின் உரிமையாளர் இலான் மஸ்க் மற்றும் வலதுசாரித் தலைவர் டாமி ராபின்சன் உள்ளிட்டோர் தொடர் போராட்டங்களுக்கு அழைப்பு விடுத்ததைத் தொடர்ந்து பெல்ஃபாஸ்ட் நகரம் வன்முறைப் பிடிக்குள் சிக்கியது.
நள்ளிரவில் முகமூடி அணிந்து வந்த கும்பல் “வெளிநாட்டினரே வெளியேறுங்கள்” (Foreigners Out) என்று முழக்கமிட்டபடி, குடியேறிகளின் வீடுகளுக்குள் புகுந்து கண்ணில் பட்ட வாகனங்கள், பேருந்துகள் மற்றும் கடைகளுக்குத் தீ வைத்தனர். பல குடும்பங்கள் தங்களின் உயிரைக் கையில் பிடித்துக் கொண்டு, காவல்துறைப் பாதுகாப்போடு வீடுகளை விட்டு வெளியேறிப் பாதுகாப்பான இடங்களுக்குத் தப்பியோடினர். ஒரு நள்ளிரவுக் காட்சியில், ஒரு வீட்டின் வாசலில் நின்ற கும்பல் அங்கிருந்த கனமான குப்பைத் தொட்டியை ஆயுதமாகப் பயன்படுத்தி ஜன்னல் கண்ணாடிகளை உடைத்து நொறுக்கியது, அங்கு வாழும் அகதிகளுக்கு விடுக்கப்பட்ட நேரடி எச்சரிக்கையாகப் பார்க்கப்படுகிறது. நிலைமையைக் கட்டுக்குள் கொண்டு வர முற்பட்ட காவல்துறையினரின் வாகனங்கள் மீதும் கல்வீச்சுத் தாக்குதல்கள் நடத்தப்பட்டன.
பிரிட்டன் பிரதமர் கீர் ஸ்டார்மர் (Keir Starmer) இந்தத் தாக்குதலை “மக்களின் பின்னணியைக் குறிவைத்து நடத்தப்பட்ட அப்பட்டமான சகிப்புத்தன்மையற்ற செயல்” என்று கடுமையாகச் சாடியுள்ளார். வன்முறையில் ஈடுபட்டவர்கள் சட்டத்தின் முன் நிறுத்தப்படுவார்கள் என்றும் அவர் எச்சரித்துள்ளார். இதேபோல், வடக்கு அயர்லாந்தின் முதலமைச்சர் மிஷெல் ஓ நீல் (Michelle O’Neill), “முகமூடி அணிந்த கோழைக் கும்பல் குடும்பங்களை வீட்டை விட்டு விரட்டுவது அநாகரிகமானது” என்று தனது கண்டனத்தைப் பதிவு செய்துள்ளார். ஒரு கத்திக் குத்துச் சம்பவம், ஒட்டுமொத்த சர்வதேசக் குடியேறிகளுக்கு எதிரான ஒரு பெரும் இனவாதக் கலவரமாக வெடித்திருப்பது சர்வதேச அளவில் பிரிட்டனின் பாதுகாப்பைக் கேள்விக்குறியாக்கியுள்ளது.
