ஐரோப்பிய மற்றும் நோர்டிக் ஊடகங்கள் இணைந்து நடத்திய அதிர்ஷ்டிரட்டும் புதிய புலனாய்வு விசாரணையில், நேட்டோ (NATO) அமைப்பில் உள்ள நாடுகளின் எல்லைகளுக்கு அருகே ரஷ்யா தனது ராணுவ உள்கட்டமைப்புகளை மிகத்தீவிரமாக விரிவுபடுத்தி வருவது வெளிச்சத்திற்கு வந்துள்ளது. பிளானட் லேப்ஸ் (Planet Labs) நிறுவனத்தின் சமீபத்திய செயற்கைக்கோள் புகைப்படங்களை ஆய்வு செய்ததில், பின்லாந்து, நார்வே மற்றும் பால்டிக் நாடுகளின் எல்லைகளில் புதிய ராணுவ முகாம்கள், ஆயுதக் கிடங்குகள் மற்றும் தளவாட சேமிப்பு மையங்கள் பிரம்மாண்டமாக உருவாக்கப்பட்டு வருவது உறுதி செய்யப்பட்டுள்ளது. உக்ரைன் போர் தீவிரமாக நடந்து வரும் நிலையிலும், ரஷ்ய அதிபர் விளாடிமிர் புடின் இந்த எல்லை விரிவாக்க உத்திகளை முடுக்கிவிட்டுள்ளார்.
இந்த பிரம்மாண்ட கட்டுமானங்கள் வெறும் தற்காப்பிற்காகவோ அல்லது சாதாரண ராணுவ பலத்தை காட்டுவதற்காகவோ செய்யப்படவில்லை என்று சுவீடன் மற்றும் நார்வே நாட்டின் உளவுத்துறை தலைவர்கள் எச்சரித்துள்ளனர். எதிர்காலத்தில் நேட்டோ நாடுகளுடன் ஏற்படக்கூடிய ஒரு பெரிய அளவிலான நேரடி மோதலுக்கு ரஷ்யாவை தயார்படுத்தும் நோக்கில் தான் இந்த உள்கட்டமைப்புகள் உருவாக்கப்படுவதாக சுவீடன் ராணுவ உளவுத்துறை தலைவர் தாமஸ் நில்சன் தெரிவித்துள்ளார். அடுத்த 1 முதல் 3 ஆண்டுகளில் ரஷ்யாவிடமிருந்து ஐரோப்பிய நாடுகளுக்கு ஆபத்து மிக அதிகமாக இருக்கும் என்றும் கணிக்கப்பட்டுள்ளது.
இந்த புதிய ராணுவ விரிவாக்கத்தின் மூலம், வடக்கு ஐரோப்பா மற்றும் பால்டிக் எல்லைகளில் மட்டும் சுமார் 1,15,000 படை வீரர்களை நிலைநிறுத்த ரஷ்யா திட்டமிட்டுள்ளது. குறிப்பாக, பின்லாந்து எல்லையில் இதற்கு முன்பு 20,000 ஆக இருந்த ரஷ்ய வீரர்களின் எண்ணிக்கை, இனிவரும் காலங்களில் 80,000 ஆக உயர்த்தப்படலாம் என்று பின்லாந்து ராணுவ தளபதி பாசி வாலிமாகி தெரிவித்துள்ளார். இதேபோல் நார்வே எல்லைக்கு மிக அருகில் உள்ள பெச்செங்கா (Pechenga) பகுதியிலும் 17,000 வீரர்கள் தங்கும் அளவுக்கு புதிய குடியிருப்புகள் மிகவேகமாக கட்டப்பட்டு வருகின்றன.
நாசாவின் இரவு நேர வெளிச்சத் தரவுகளின்படி (NASA satellite data on nighttime light levels), ரஷ்ய எல்லையில் உள்ள 19 முக்கிய ராணுவ மையங்களில் 16 மையங்கள் கடந்த ஓராண்டில் முன்பை விட அதிக வெளிச்சத்துடன் சுறுசுறுப்பாக இயங்கி வருவது கண்டறியப்பட்டுள்ளது. நிலம், வான், கடல், விண்வெளி மற்றும் சைபர் ஸ்பேஸ் என அனைத்து தளங்களிலும் நேட்டோவை எதிர்கொள்ள ரஷ்யா தனது சிறிய பிரிகேட் படைகளை பெரிய டிவிஷன்களாக மாற்றி அமைத்து வருகிறது. உக்ரைன் போரில் தற்காலிக அமைதி ஏற்பட்டால், இந்த எல்லையோர ராணுவ குவிப்பு ஐரோப்பிய பாதுகாப்பிற்கு பெரும் அச்சுறுத்தலாக மாறும் என நேட்டோ அதிகாரிகள் எச்சரித்துள்ளனர்.
