மும்பை: ஐபிஎல் தொடரில் சென்னை சூப்பர் கிங்ஸ் அணி, பொதுவாக பிளேஆஃப் சுற்றுக்குத் தகுதிபெற பெரு சிக்கல்களையோ, அல்லது கடைசி நேர வெற்றிகளையோ நம்பியதில்லை. 2008-ல் போட்டி தொடங்கியதிலிருந்து, தொடர்ந்து பத்து சீசன்களாக முதல் நான்கு இடங்களுக்குள் வந்து, பிளேஆஃப்க்கு சாதாரணமாக முன்னேறி வந்தது.
ஐந்து முறை சாம்பியன் பட்டம் வென்ற இந்த அணி, இம்முறை பிளேஆஃப் தகுதி பெறுவதில் சிக்கல் ஏற்பட்டு உள்ளது. பெரும்பாலும் புள்ளிப் பட்டியலில் முதல் இரண்டு இடங்களை உறுதி செய்த சிஎஸ்கே இப்போது சீசனின் பிற்பகுதியில் ஏற்படும் சிக்கல்களுடன் போராட வேண்டியுள்ளது.
2023-ல் ஐந்தாவது கோப்பையை வென்றது முதல், சிஎஸ்கே அணி நாக் அவுட் சுற்றுக்குத் தகுதிபெறவில்லை. வரவிருக்கும் நாட்களில் லீக் நிலை முடிவுகள் சாதகமாக அமையாவிட்டால், தொடர்ந்து மூன்று சீசன்கள் பிளேஆஃப் வாய்ப்பை இழக்கும் நிலை ஏற்படலாம். இந்தச் சூழலில், ஐ.பி.எல். பிளேஆஃப்/அரையிறுதிக்கு முன் சிஎஸ்கே வாழ்வா சாவா என்ற சவாலை எதிர்கொண்ட மூன்று தருணங்களைப் பார்க்கலாம்.
CSK: இனி ஒவ்வொரு போட்டியும் எங்களுக்கு ஃபைனல் மாதிரி.. பிளே ஆப் குறித்து பயிற்சியாளர் ஹஸி கருத்து
1. ஐபிஎல் 2010
2008 மற்றும் 2009 ஐபிஎல் தொடர்களில் முதல் இரண்டு இடங்களைப் பிடித்து பிளேஆஃப்க்கு எளிதாகத் தகுதிபெற்ற சிஎஸ்கே அணிக்கு, 2010 சீசனில் முதல் நான்கு இடங்களுக்குள் வருவது சவாலாக இருந்தது. சீசனின் நடுப்பகுதியில் நான்கு போட்டிகளில் தொடர்ச்சியாகத் தோல்வியடைந்ததால், முதல் ஏழு ஆட்டங்களில் இரண்டே வெற்றிகளுடன் தடுமாறியது.
அந்தக் காலகட்டத்தில் பிளேஆஃப் தகுதிபெற 14 புள்ளிகள் என்பது ஒரு பொதுவான அளவுகோலாக இருந்தது.சிஎஸ்கே அணிக்கு ஐந்துக்கும் மேற்பட்ட வெற்றிகள் தேவைப்பட்டன. தோனி தலைமையிலான அணி அடுத்த ஐந்து போட்டிகளில் நான்கு வெற்றிகளைப் பெற்று, 12 போட்டிகளில் 12 புள்ளிகளுடன் இருந்தது.
ஆனாலும், சொந்த மண்ணில் டெல்லி டேர்டெவில்ஸ் (தற்போது டெல்லி கேபிடல்ஸ்) அணியிடம் தோல்வியடைந்ததால், தர்மசாலாவில் கிங்ஸ் லெவன் பஞ்சாப் (தற்போது பஞ்சாப் கிங்ஸ்) அணிக்கு எதிரான கடைசி லீக் ஆட்டம் சிஎஸ்கே வுக்கு வாழ்வா சாவா போட்டியாக அமைந்தது.
கொல்கத்தா நைட் ரைடர்ஸுக்கு எதிராக 140 ரன்கள் இலக்கை 13.3 ஓவர்களில் துரத்தியதும், மற்ற சமீபத்திய வெற்றிகளும் சிஎஸ்கே வுக்கு சிறந்த நெட் ரன் ரேட் நன்மையை அளித்தன. இருப்பினும், தகுதிபெற 14 புள்ளிகள் அவசியம்.
பஞ்சாப்புக்கு எதிரான 'நாக்அவுட்' ஆட்டத்தில், சிஎஸ்கே 193 ரன்கள் இலக்கை எதிர்கொண்டது. தோனியின் புகழ்பெற்ற கடைசி ஓவர் ஃபினிஷ் மூலம், இரண்டு பந்துகள் மீதமிருக்கசிஎஸ்கே இலக்கை எட்டிப் பிடித்தது.
லீக் சுற்றின் முடிவில் 14 புள்ளிகள் பெற்ற ஐந்து அணிகளில் ஒன்றாக சிஎஸ்கே இருந்தது. ஆனாலும், சிறந்த நெட் ரன் ரேட்டின் அடிப்படையில் மூன்றாவது இடத்தைப் பிடித்தது. பின்னர் அரையிறுதியில் டெக்கான் சார்ஜர்ஸ் மற்றும் இறுதிப் போட்டியில் மும்பை இந்தியன்ஸ் அணிகளை வென்று தனது முதல் ஐபிஎல் பட்டத்தை வென்றது.
2 ஐபிஎல் 2024
2024 ஐ.பி.எல். சீசனில் புதிய கேப்டன் ருதுராஜ் கெய்க்வாட் தலைமையில் சிஎஸ்கே நல்ல தொடக்கத்தைப் பெற்றது. ஆனால், லக்னோ சூப்பர் ஜெயன்ட்ஸுக்கு எதிராக அடுத்தடுத்து ஏற்பட்ட தோல்விகள் அவர்களது முன்னேற்றத்தைத் தடம் புரளச் செய்து, அவர்களை புள்ளிப்பட்டியலின் மத்திய வரிசைப் போட்டியில் சிக்க வைத்தது.
சீசனின் இரண்டாவது பாதியில் சிஎஸ்கே வால் தொடர்ச்சியான வெற்றிகளைப் பெற முடியவில்லை. இதனால், அவர்களின் பரம போட்டியாளர்களான ராயல் சேலஞ்சர்ஸ் பெங்களூரு அணிக்கு எதிராக, வெளியூரில் நடந்த ஒரு வாழ்வா சாவா மோதலுக்குத் தள்ளப்பட்டனர்.
இந்த போட்டிக்கு வரும்போது சி.எஸ்.கே. இரண்டு புள்ளி முன்னிலையில் இருந்தது. ஆனால், ஆர்.சி.பி.யை விட குறைந்த நெட் ரன் ரேட்டைக் கொண்டிருந்தது. இதன் விளைவாக, ருதுராஜ் கெய்க்வாட் தலைமையிலான அணி நேராக வெல்ல வேண்டும் அல்லது 17 ரன்கள் வித்தியாசத்தில் அல்லது அதற்கும் குறைவாகத் தோற்க வேண்டும்.
போட்டி ரத்து செய்யப்பட்டிருந்தாலும் சிஎஸ்கே வுக்குச் சாதகமாக இருந்திருக்கும், ஏனெனில் அவர்களின் மொத்தப் புள்ளிகள் 15 ஆக உயர்ந்திருக்கும். ஆனால், அந்த நாக் அவுட் மோதலில் திட்டமிட்டபடி எதுவும் நடக்கவில்லை. ஆர்.சி.பி. அணி வலுவான 218 ரன்கள் குவித்து, சிஎஸ்கே 27 ரன்கள் வித்தியாசத்தில் தோல்வியடைந்தது.
இறுதியில் இரு அணிகளும் 14 புள்ளிகளுடன் முடித்தாலும், ஃபாஃப் டு பிளெஸ்ஸிஸ் தலைமையிலான ஆர்.சி.பி. அணி, அவர்களின் சிறந்த நெட் ரன் ரேட்டின் அடிப்படையில் பிளேஆஃப் சுற்றுக்கான இறுதி இடத்தைப் பிடித்தது.
3. ஐபிஎல் 2026
நடப்பு சீசனில் 12 லீக் போட்டிகளில் 12 புள்ளிகளை மட்டுமே பெற்றுள்ள சிஎஸ்கே அணி மீண்டும் ஒரு சிக்கலான சூழ்நிலையில் உள்ளது. புள்ளிப்பட்டியலின் தற்போதைய நிலவரத்தைப் பார்க்கும்போது, ஆறு அணிகள் நான்கு இடங்களுக்காகப் போட்டியிடுகின்றன. இதில் இரண்டு அணிகள் கிட்டத்தட்ட தங்கள் இடங்களை உறுதி செய்துவிட்டன.
நான்காவது இடத்திற்கு 16 புள்ளிகள் ஒரு தகுதி அளவுகோலாக இருக்கலாம் எனக் கருதப்படுகிறது. லக்னோ சூப்பர் ஜெயன்ட்ஸுக்கு எதிராக வெளியூரில் சமீபத்தில் ஏற்பட்ட ஏழு விக்கெட் தோல்வி, சிஎஸ்கே வின் நெட் ரன் ரேட்டைக் கணிசமாகப் பாதித்தது. இதனால், சிஎஸ்கே அணிக்கு பெரும் பின்னடைவு ஏற்பட்டது.
சிஎஸ்கே அணி மறுபடியும் ஒரு கட்டாய வெற்றிச் சூழலில் தள்ளப்பட்டுள்ளது. அடுத்து வரும் இரண்டு போட்டிகளில் சன்ரைசர்ஸ் ஹைதராபாத் மற்றும் குஜராத் டைட்டன்ஸ் அணிகளை எதிர்கொள்ளும் சிஎஸ்கே அணிக்கு, நான்கு புள்ளிகள் பெறுவது கடினமான பணியாகும்.
CSK: ருதுராஜ் கேப்டன்ஷி படுமோசம்.. லக்னோ வென்றதுக்கே சிஎஸ்கே செய்த இந்த தவறு தான் காரணம்- சேவாக்
சிஎஸ்கே 14 புள்ளிகளுடன் முடித்தாலும், கணித ரீதியாக வெளியேறாது. ஆனால், பிளேஆஃப் போட்டியில் முன்னிலை பெற வேண்டும் என்ற முனைப்பில் ஐந்து மற்ற அணிகளும் தீவிரமாக உள்ளதால், பிற அணிகளின் முடிவுகளை நம்பி இருக்க வேண்டிய ஒரு இக்கட்டான நிலைமை சி.எஸ்.கே.வுக்கு ஏற்படும்.
