அமெரிக்காவின் ஹவாய் தீவுக் கூட்டத்தில் உள்ள பிக் ஐலாண்ட் (Big Island) பகுதியில் வெள்ளிக்கிழமை இரவு ரிக்டர் அளவுகோலில் 6.0 என்ற அளவில் சக்திவாய்ந்த நிலநடுக்கம் ஏற்பட்டுள்ளது. ஹோனாவுனாவ்-நாபூபூ (Hōnaunau-Nāpōʻopoʻo) பகுதிக்கு அருகே சுமார் 23 கிலோமீட்டர் ஆழத்தில் இந்த நிலநடுக்கம் மையம் கொண்டிருந்ததாக அமெரிக்க புவியியல் ஆய்வு மையம் (USGS) தெரிவித்துள்ளது. இரவு நேரத்தில் நிலம் திடீரென பயங்கரமாக அதிர்ந்ததால் வீடுகளில் இருந்த மக்கள் அலறியடித்துக் கொண்டு தெருக்களில் தஞ்சம் புகுந்தனர்.
இந்த நிலநடுக்கமானது பிக் ஐலாண்ட் மட்டுமின்றி, அதன் அண்டை தீவுகளான மௌய் (Maui) மற்றும் ஓஹு (Oahu) வரை மிகக் கடுமையான அதிர்வுகளை ஏற்படுத்தியுள்ளது. நிலநடுக்கத்தின் தீவிரத்தால் சில பகுதிகளில் உள்ள வீடுகளில் லேசான விரிசல்கள் ஏற்பட்டுள்ளதாகவும், மலைப்பாங்கான சாலைகளில் பெரிய பாறைகள் மற்றும் இடிபாடுகள் உருண்டு விழுந்ததால் போக்குவரத்து தற்காலிகமாகப் பாதிக்கப்பட்டுள்ளதாகவும் ஹவாய் கவுண்டி சிவில் பாதுகாப்புப் பிரிவு தெரிவித்துள்ளது. அதிர்ஷ்டவசமாக, இந்த இயற்கை சீற்றத்தால் உயிர்ச்சேதமோ அல்லது கடுமையான காயங்களோ ஏற்பட்டதாக உடனடித் தகவல்கள் எதுவும் வெளியாகவில்லை.
இந்தச் சக்திவாய்ந்த நிலநடுக்கத்தைத் தொடர்ந்து, உலகின் மிகவும் சுறுசுறுப்பான எரிமலைகளில் ஒன்றான ‘கிலாயூவா’ (Kilauea) எரிமலையின் செயல்பாடுகளை அமெரிக்க விஞ்ஞானிகள் தீவிரமாக ஆய்வு செய்து வருகின்றனர். ஏற்கனவே கடந்த 2024 டிசம்பர் முதல் இந்த எரிமலை அவ்வப்போது லாவா எனப்படும் எரிமலைக் குழம்பைக் கக்கி வரும் நிலையில், மே 24 முதல் மே 27-க்குள் மீண்டும் ஒருமுறை பெரிய அளவில் எரிமலை வெடிப்பு ஏற்பட வாய்ப்புள்ளதாக முன்னரே கணிக்கப்பட்டிருந்தது. தற்போது ஏற்பட்டுள்ள நிலநடுக்கம் இந்த எரிமலை வெடிப்பை மேலும் துரிதப்படுத்தலாம் என்பதால், ஹவாய் எரிமலை கண்காணிப்பகம் (HVO) அவசரக் ஆய்வுகளைத் தொடங்கியுள்ளது.
இந்த நிலநடுக்கத்தால் கடலில் சுனாமி பேரலைகள் உருவாவதற்கான சாத்தியக்கூறுகள் இல்லை என்று பசிபிக் சுனாமி எச்சரிக்கை மையம் (PTWC) நிம்மதியளிக்கும் தகவலை வெளியிட்டுள்ளது. இருப்பினும், முதன்மை நிலநடுக்கத்தைத் தொடர்ந்து அடுத்தடுத்து லேசான நில அதிர்வுகள் (Aftershocks) ஏற்பட வாய்ப்புள்ளதால், பொதுமக்கள் அனைவரும் தொடர்ந்து எச்சரிக்கையுடன் இருக்க வேண்டும் என்றும், தங்களின் வீடுகளில் உள்ள எரிவாயு மற்றும் மின் இணைப்புகளைச் சரிபார்த்துக் கொள்ளுமாறும் அதிகாரிகள் அறிவுறுத்தியுள்ளனர்.
