தமிழ் சினிமாவின் உச்ச நட்சத்திரமான தளபதி விஜய் நடிப்பில் உருவாகியுள்ள ‘ஜன நாயகன்’ (தளபதி 69) திரைப்படம், தணிக்கை வாரியத்துடனான (CBFC) பாரிய மோதலுக்குப் பின்னர் தற்போது சட்டப் போராட்டத்தை எதிர்நோக்கியுள்ளது. விஜயினுடைய திரைப்பயணத்தின் இறுதித் திரைப்படம் இது என்பதால், உலகெங்கிலும் உள்ள அவரது ரசிகர்கள் மத்தியில் இத்திரைப்படம் பெரும் எதிர்பார்ப்பை ஏற்படுத்தியுள்ளது. குறிப்பாக இலங்கை மற்றும் புலம்பெயர் தமிழ் மக்கள் மத்தியில் விஜயினுடைய அரசியல் பிரவேசம் மற்றும் இந்த இறுதித் திரைப்படம் குறித்தான ஆர்வம் உச்சகட்டத்தில் உள்ளது.
இயக்குநர் எச். வினோத் இயக்கத்தில் கே.வி.என் புரொடக்ஷன்ஸ் தயாரித்துள்ள இந்தத் திரைப்படம், சமகால அரசியல் பிரச்சினைகளை மையமாகக் கொண்டு உருவாக்கப்பட்டுள்ளது. தணிக்கை வாரியம் இந்தப் படத்தில் பல முக்கிய காட்சிகளையும் வசனங்களையும் நீக்குமாறு பரிந்துரைத்திருந்தது. இருப்பினும், அத்தகைய மாற்றங்கள் படத்தின் மையக் கருத்தைப் பாதிக்கும் எனக் கூறி படக்குழு அதனை நிராகரித்துள்ளது. இந்த விவகாரம் தற்போது சென்னை உயர் நீதிமன்றத்திற்குச் சென்றுள்ளது. அண்மையில் நடைபெற்ற விசாரணையில், தணிக்கை வாரியத்தின் பிடிவாதமான போக்கு குறித்து நீதிபதிகள் அதிருப்தி வெளியிட்டதுடன், தீர்ப்பினை ஒத்திவைத்துள்ளனர்.
தமிழக முதல்வர் மு.க. ஸ்டாலின் இந்த விவகாரத்தில் விஜயிற்கு ஆதரவாகக் குரல் கொடுத்துள்ளமை குறிப்பிடத்தக்கது. மத்திய அரசாங்கம் தணிக்கை வாரியத்தை அரசியல் ரீதியாகப் பயன்படுத்துவதாக அவர் குற்றம் சாட்டியுள்ளார். அனிருத் ரவிச்சந்தர் இசையமைத்துள்ள இந்தப் படத்தில் பொபி தியோல், பூஜா ஹெக்டே மற்றும் மமிதா பைஜூ ஆகியோர் முக்கிய கதாபாத்திரங்களில் நடித்துள்ளனர். இலங்கையில் உள்ள விஜய் ரசிகர் மன்றங்கள் இந்தப் படத்தின் வெளியீட்டுக்காகப் பிரம்மாண்டமான ஏற்பாடுகளைச் செய்து வரும் நிலையில், தணிக்கை சிக்கல்கள் காரணமாக படத்தின் வெளியீட்டுத் திகதி தள்ளிப் போகக்கூடும் என்ற அச்சம் எழுந்துள்ளது. எவ்வாறாயினும், ஜனவரி இறுதிக்குள் ஒரு சுமுகமான தீர்வு எட்டப்படும் எனத் திரைத்துறை வட்டாரங்கள் நம்பிக்கை தெரிவித்துள்ளன.
