ஆமீர் கான் புரொடக்ஷன்ஸ் நிறுவனத்தின் தயாரிப்பில் மிகுந்த எதிர்பார்ப்புடன் வெளியான ‘ஹேப்பி படேல்: காதர்னாக் ஜாசூஸ்’ (Happy Patel: Khatarnaak Jasoos) திரைப்படம் பாக்ஸ் ஆபீஸில் படுதோல்வியைச் சந்தித்துள்ளது. முதல் வார முடிவில் இந்தப் படம் வெறும் 4.80 கோடி ரூபாய்களை மட்டுமே வசூலித்துள்ளதாகத் தகவல்கள் தெரிவிக்கின்றன.
பிரபல ஸ்டாண்ட்-அப் நகைச்சுவை நடிகர் வீர் தாஸ் (Vir Das) நடிப்பில் வெளியான இந்தப் படம் ஒரு ஸ்பை-காமெடி (Spy Comedy) வகையைச் சேர்ந்தது. ஆமீர் கான் மற்றும் இம்ரான் கான் ஆகியோர் கௌரவத் தோற்றத்தில் நடித்திருந்தும் கூட, படத்திற்குப் போதிய வரவேற்பு கிடைக்கவில்லை. படத்தின் திரைக்கதை மற்றும் நகைச்சுவைக் காட்சிகள் இரசிகர்களைக் கவரத் தவறியதே இந்தத் தோல்விக்குக் காரணம் என விமர்சிக்கப்படுகிறது.
திரையரங்குகளில் முதல் நாளில் 1.10 கோடி வசூலித்த இப்படம், வார இறுதி நாட்களில் ஓரளவு வசூல் செய்தாலும், வார நாட்களில் மிக மோசமான சரிவைச் சந்தித்தது. குறிப்பாக 7ஆவது நாளில் வெறும் 15 இலட்சம் ரூபாய்களை மட்டுமே வசூலித்துள்ளது. இதனால் திரையரங்குகளிலிருந்து இந்தப் படம் விரைவில் அகற்றப்படும் என்று தெரிகிறது.
தற்போது சன்னி தியோல் நடிப்பில் வெளியாகியுள்ள ‘பார்டர் 2’ (Border 2) திரைப்படத்தின் ஆதிக்கம் அதிகமாக உள்ளதால், ‘ஹேப்பி படேல்’ படத்திற்கு மீண்டு வருவதற்கான வாய்ப்புகள் மிகக் குறைவாகவே உள்ளன. இதற்கிடையில், இந்தப் படம் விரைவில் ஆமீர் கானின் யூடியூப் தளத்தில் அல்லது பிரபல OTT தளத்தில் வெளியாகும் என்று கூறப்படுகிறது. தரம் குறைந்த நகைச்சுவை மற்றும் பலவீனமான கதைக்களம் காரணமாக ஒரு நட்சத்திர தயாரிப்பு நிறுவனத்தின் படம் இவ்வளவு மோசமான வசூலைப் பெற்றுள்ளது பாலிவுட் வட்டாரத்தில் அதிர்ச்சியை ஏற்படுத்தியுள்ளது.
