தமிழகத்தில் 2026 ஆம் ஆண்டு நடைபெறவுள்ள சட்டசபைத் தேர்தலை முன்னிட்டு அரசியல் களம் தற்போதே சூடுபிடிக்கத் தொடங்கியுள்ளது. இந்நிலையில், தேர்தல் பிரசாரத்திற்காக தமிழகம் வந்துள்ள இந்தியப் பிரதமர் நரேந்திர மோடியின் வருகையை முன்னிட்டு, தமிழக முதல்வர் மு.க. ஸ்டாலின் அவர்கள் கடுமையான விமர்சனங்களை முன்வைத்துள்ளார். குறிப்பாக, பாரதிய ஜனதா கட்சி அடிக்கடி பயன்படுத்தும் ‘டபிள் என்ஜின்’ (Double Engine) அரசாங்கம் எனும் வாசகத்தை விமர்சித்துள்ள முதல்வர், அது தமிழகத்தில் ஓடாத ஒரு ‘டப்பா என்ஜின்’ எனச் சாடியுள்ளார்.
மதுராந்தகத்தில் இன்று இடம்பெறவுள்ள தேசிய ஜனநாயகக் கூட்டணியின் பிரம்மாண்டமான தேர்தல் பிரசாரக் கூட்டத்தில் பங்கேற்பதற்காக பிரதமர் மோடி தமிழகம் வந்துள்ளார். இச்சந்தர்ப்பத்தில் தனது சமூக வலைத்தளப் பக்கத்தில் அறிக்கை ஒன்றை வெளியிட்டுள்ள முதல்வர் ஸ்டாலின், தமிழகத்திற்குச் சேரவேண்டிய உரிமைகள் மற்றும் நிதி ஒதுக்கீடுகள் குறித்துப் பல கேள்விகளை எழுப்பியுள்ளார். குறிப்பாக, ‘சமக்ர சிக்ஷா’ (Samagra Shiksha) கல்வித் திட்டத்திற்காக தமிழகத்திற்கு வழங்கப்பட வேண்டிய 3,458 கோடி ரூபாய் நிதி இன்னும் ஏன் விடுவிக்கப்படவில்லை எனக் கேள்வி எழுப்பினார்.
மேலும், ஓசூர் சர்வதேச விமான நிலையத் திட்டம், கோவை மற்றும் மதுரை மெட்ரோ ரயில் செயற்றிட்டங்கள் ஆகியவற்றுக்கான மத்திய அரசாங்கத்தின் ஒப்புதல் எப்போது கிடைக்கும் என அவர் வினவியுள்ளார். மதுரை எய்ம்ஸ் (AIIMS) மருத்துவமனைப் பணிகள் கடந்த பத்து ஆண்டுகளாக மிகவும் மந்தகதியில் முன்னெடுக்கப்பட்டு வருவதைச் சுட்டிக்காட்டிய முதல்வர், அதனை ‘எட்டாவது உலக அதிசயம்’ என நகைச்சுவையாக விமர்சித்தார். தமிழக மக்களின் நீண்டகாலக் கோரிக்கையான ‘நீட்’ (NEET) தேர்விலிருந்து விலக்கு அளிக்கும் சட்டமூலம் குறித்து மத்திய அரசாங்கம் மௌனம் காப்பது ஏன் எனவும் அவர் தனது அறிக்கையில் குறிப்பிட்டுள்ளார்.
தமிழகத்தின் கலாசார விழுமியங்களையும் மொழியையும் மதிப்பது போலக் காட்டிக்கொண்டு, செயலில் மாற்றாந்தாய் மனப்பான்மையுடன் மத்திய அரசாங்கம் செயற்படுவதாக அவர் குற்றம் சுமத்தினார். கீழடி அகழ்வாராய்ச்சி தொடர்பான உத்தியோகபூர்வ அறிக்கையை வெளியிடுவதில் தாமதம் காட்டுவது மற்றும் தமிழகத் தொகுதிகள் மீள்நிர்ணயம் (Delimitation) செய்யப்படும்போது தமிழகத்தின் பிரதிநிதித்துவம் குறைக்கப்படாது என்ற உறுதியான வாக்குறுதியை பிரதமர் மோடி வழங்க வேண்டும் எனவும் அவர் வலியுறுத்தியுள்ளார். பிரதமரின் வருகை அரசியல் ரீதியாகப் பல மாற்றங்களை ஏற்படுத்தும் என எதிர்பார்க்கப்படும் நிலையில், முதல்வரின் இந்தச் சவால்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.
