மண்டைதீவு புதைகுழி வழக்கு: மார்ச் 31ஆம் திகதிக்கு ஒத்திவைப்பு! – Global Tamil News

1990ஆம் ஆண்டு மண்டைதீவு பகுதியில் இடம்பெற்ற மனிதப் படுகொலைகள் மற்றும் புதைகுழிகள் தொடர்பான வழக்கு விசாரணைகள் எதிர்வரும் மார்ச் மாதம் 31ஆம் திகதிக்கு திகதியிடப்பட்டுள்ளது. வழக்கின் பின்னணி: 1990 ஆகஸ்ட் 25 மற்றும் 26 ஆகிய நாட்களில் இராணுவத்தினர் மேற்கொண்ட நடவடிக்கையின் போது, மண்டைதீவு, அல்லைப்பிட்டி, மண்கும்பான் பகுதிகளில் பாரிய படுகொலைகள் நிகழ்த்தப்பட்டன. கொல்லப்பட்டவர்களின் உடல்கள் அங்குள்ள கிணறுகளில் போட்டு மூடப்பட்டதாகக் குற்றம் சாட்டப்பட்டது. தனது மகனைப் பறிகொடுத்த தாய் ஒருவர், குறித்த கிணறுகளை அகழ்ந்து விசாரணைகளை முன்னெடுக்குமாறு ஊர்காவற்றுறை பொலிஸ் நிலையத்தில் செய்த முறைப்பாட்டின் அடிப்படையில் இந்த வழக்கு நடைபெற்று வருகிறது. இன்றைய நீதிமன்ற நடவடிக்கை: பாதிக்கப்பட்ட மக்கள், கடற்படையினர், இராணுவத்தினர் மற்றும் கிணறுகள் தொடர்பான விசாரணை அறிக்கையை பொலிஸார் நேற்று கையெழுத்துப் பிரதியாக நீதிமன்றில் சமர்ப்பித்தனர். அவ்வறிக்கையை தட்டச்சு பிரதியாக (Typed Copy) சமர்ப்பிக்குமாறு நீதவான் உத்தரவிட்ட நிலையில், இன்று பொலிஸாரால் தட்டச்சு பிரதி சமர்ப்பிக்கப்பட்டது. இதனைத் தொடர்ந்து, மேலதிக விசாரணைகளுக்காக வழக்கு மார்ச் 31ஆம் திகதிக்கு ஒத்திவைக்கப்பட்டது. நீதிக்காகக் காத்திருக்கும் பாதிக்கப்பட்ட குடும்பங்களின் குரலாக இந்த வழக்கு தொடர்ந்து முன்னெடுக்கப்பட்டு வருகின்றது. #Mandaitivu #MassGrave #JusticeForTamil #HumanRights #SriLanka #KaytsCourt #JusticeDelayed #MissingInAction #மண்டைதீவு #புதைகுழி #நீதி #இலங்கை #ஊர்காவற்றுறை