பம்பாய் தமிழர்களை எதிர்த்த சிவசேனா, இன்று இந்தி மொழிக்கு எதிராகத் திரும்பியது எப்படி?

பட மூலாதாரம், Getty Images

படக்குறிப்பு, சிவசேனா (கோப்புப் படம்)எழுதியவர், முரளிதரன் காசிவிஸ்வநாதன்பதவி, பிபிசி தமிழ்19 நிமிடங்களுக்கு முன்னர்

மகாராஷ்டிர மாநிலத்தில் இந்தி திணிப்புக்கு எதிரான போராட்டத்திற்கு தமிழ்நாடு முதல்வர் மு.க.ஸ்டாலின் ஆதரவளித்திருக்கிறார். ஆனால், ஒரு காலகட்டத்தில் தமிழர்களுக்கு எதிரான உணர்வுகளும் மகாராஷ்டிர மாநிலத்தில் தீவிரமாக இருந்துள்ளன. இந்த நிலையில் தற்போது காட்சிகள் மாறியது எப்படி?

மகாராஷ்டிர மாநிலத்தில் தொடக்கப் பள்ளிகளில் இந்தியை கட்டாய மூன்றாவது மொழியாகப் பயிற்றுவிக்க ராஜ் தாக்கரேவின் மகாராஷ்டிரா நவநிர்மாண் சேனா (எம்என்எஸ்) கட்சியும் முன்னாள் முதல்வர் உத்தவ் தாக்கரேவின் கட்சியான சிவசேனா (உத்தவ் பாலாசாகேப் தாக்கரே) கட்சியும் இணைந்து கடுமையான எதிர்ப்பைத் தெரிவித்து வருகின்றன.

மகாராஷ்டிராவில் மராத்தி மற்றும் ஆங்கில வழிப் பள்ளிகளில் ஒன்றாம் வகுப்பு முதல் ஐந்தாம் வகுப்பு வரை படிக்கும் மாணவர்களுக்கு இந்தி கட்டாயமாக மூன்றாவது மொழிப் பாடமாக இருக்கும் என்று கடந்த ஏப்ரல் 16ஆம் தேதியன்று மகாராஷ்டிரா அரசு ஆணை ஒன்றை வெளியிட்டிருந்தது.

படக்குறிப்பு, பிபிசி தமிழ் வாட்ஸ்ஆப் சேனலில் இணைய இங்கே கிளிக் செய்யவும்.அரசின் இந்த ஆணைக்கு அரசியல்வாதிகள், மொழியியலாளர்கள், திரைநட்சத்திரங்கள், சமூக ஆர்வலர்கள் ஆகியோர் கடும் எதிர்ப்பு தெரிவித்தனர். ஒன்று முதல் ஐந்தாம் வகுப்புகளுக்கான இந்தி புத்தகங்களை விற்கக்கூடாது என மகாராஷ்டிரா நவநிர்மாண் சேனாவின் தலைவர் ராஜ் தாக்கரே அறிவித்தார்.

இதையடுத்து, தனது நிலைப்பாட்டில் இருந்து பின்வாங்கிய அரசு முந்தைய ஆணையைத் திருத்தி, ஒரு வகுப்பில் இந்தி அல்லாத வேறு மொழியை மூன்றாவதாகப் படிக்க 20 அல்லது அதற்கு மேற்பட்ட மாணவர்கள் விரும்பினால் அந்த மொழியைக் கற்பிக்க புதிய ஆசிரியர் நியமிக்கப்படுவார், இல்லாத பட்சத்தில் இணையம் மூலம் அந்த மொழி கற்பிக்கப்படும் என ஜூன் 17ஆம் தேதி அறிவித்தது.

Skip அதிகம் படிக்கப்பட்டது and continue reading

அதிகம் படிக்கப்பட்டது

End of அதிகம் படிக்கப்பட்டது

ஆனாலும், இந்த அறிவிப்பு இந்தி மொழி கற்பிப்பது தொடர்பான எதிர்ப்பில் எந்த மாற்றத்தையும் ஏற்படுத்தவில்லை. பால் தாக்கரேவின் குடும்பத்தைச் சேர்ந்த ராஜ் தாக்கரேவும் உத்தவ் தாக்கரேவும் கடந்த 2009ஆம் ஆண்டில் இருந்து எதிரெதிர் அரசியலில் ஈடுபட்டு வந்த நிலையில், இந்தப் போராட்டத்திற்காக இவர்கள் இருவரும் ஒன்றிணைந்து, ஜூலை 5ஆம் தேதி போராட்டம் நடத்தப் போவதாக அறிவித்தனர்.

X பதிவை கடந்து செல்ல

எச்சரிக்கை: வெளியார் தளங்களில் உள்ள பதிவுகளுக்கு பிபிசி பொறுப்பேற்காது

X பதிவின் முடிவு

இந்நிலையில் இந்தி கற்பிப்பது தொடர்பான இரு அரசாணைகளையும் திரும்பப் பெற்ற முதலமைச்சர் தேவேந்திர ஃபட்னவிஸ், பொருளாதார நிபுணர் நரேந்திர ஜாதவ் தலைமையில் ஒரு குழு அமைக்கப்படும் என்றும் அந்தக் குழுவின் பரிந்துரைகளின் அடிப்படையில் முடிவெடுக்கப்படும் என்றும் அறிவித்தார்.

இந்த நிலையில்தான், இந்தப் போராட்டத்திற்கு தமிழ்நாடு முதலமைச்சர் மு.க. ஸ்டாலின் தனது ‘எக்ஸ்’ பக்கத்தில் வாழ்த்து தெரிவித்தார்.

“இந்தித் திணிப்புக்கு எதிராக சகோதரர் உத்தவ் தாக்கரே தலைமையில் இன்று மும்பையில் நடந்த வெற்றிக் கொண்டாட்டப் பேரணியின் எழுச்சியும், உரை வீச்சும் மிகுந்த உற்சாகம் தருகிறது” என்று தனது வாழ்த்துச் செய்தியில் முதலமைச்சர் குறிப்பிட்டிருந்தார்.

கடந்த 1960களில் சிவசேனாவின் நிறுவனரான பால் தாக்கரே, பம்பாயில் பெரும்பாலான வேலைவாய்ப்புகளை தென்னிந்தியர்களே கைப்பற்றுவதாகக் கூறி, தென்னிந்தியர்களுக்கு எதிரான பிரச்சாரத்தைத் துவங்கியபோது, அதில் பெருமளவு பாதிக்கப்பட்டவர்கள் தமிழர்களாக இருந்தார்கள்.

கிட்டத்தட்ட 60 ஆண்டுகள் கழிந்திருக்கும் நிலையில், அதே சிவசேனா நடத்தும் போராட்டத்திற்கு தமிழ்நாட்டின் ஆளும் கட்சி வாழ்த்துகளைத் தெரிவித்துள்ளது.

பட மூலாதாரம், Getty Images

படக்குறிப்பு, மும்பை தாராவியில் பொங்கல் கொண்டாட்டம் கடந்த 1951ஆம் ஆண்டில் மும்பையில் வசித்தவர்களில், தென்னிந்தியர்கள் 7.8 சதவிகிதம் இருந்தனர். 1961இல் இது 8.4 சதவிகிதமாக உயர்ந்ததாக, வைபவ் புரந்தரே ‘பால் தாக்கரே: சிவசேனாவின் எழுச்சி (Bal Thackeray The Rise of the Shiv Sena)’ நூலில் குறிப்பிடுகிறார்.

“கடந்த 1960களில் பம்பாயின் அலுவலகப் பணிகளிலும் உயர் பதவிகளிலும் மகாராஷ்டிராவை சேர்ந்தவர்களின் பங்கு மிகக் குறைவாகவே இருந்தது. மகாராஷ்டிராவை சேர்ந்தவர்களுக்கும் பிறருக்கும் இடையில் இருந்த பொருளாதார சமமின்மையே சேனாவுக்கு அடிப்படையாக அமைந்தது.

பால் தாக்கரே முன்வைத்த மராட்டியர்களின் கவலைகள், அச்சங்கள், தயக்கங்களும் கட்டுரைகள் மூலமும் கார்ட்டூன்கள் மூலமும் மார்மிக் இதழில் அவர் முன்வைத்தவையும் வெறும் கற்பனைகளோ, அரசியல் பொய்களோ அல்ல. அவை பொருளாதார உண்மைகள்” என்கிறார் வைபவ் புரந்தரே.

கடந்த 1966ஆம் ஆண்டு மே மாத மார்மிக் இதழில் சிவசேனா என்ற பெயரில் இளைஞர் அமைப்பு ஒன்றை ஆரம்பிக்கப் போவதாக பால் தாக்கரே அறிவித்தார். மகாராஷ்டிராவில் அரசுப் பதவிகளை மராத்தி பேசத் தெரிந்தவர்களுக்கும் எழுதப் படிக்கத் தெரிந்தவர்களுக்குமே அளிக்க வேண்டும் எனக் கோரினார் பால் தாக்கரே.

படக்குறிப்பு, கடந்த 1950களின் தொடக்கத்தில் வேலை தேடி மும்பை சென்ற சண்முகராஜா. தற்போது 91 வயதாகும் அவர் மும்பையில் வசித்து வருகிறார்.இதற்குப் பிறகு, பால் தாக்கரே மதராஸிகள் எனக் குறிப்பிட்டு, தென்னிந்தியர்களை கடுமையாகப் பேசினார். அவர் நடத்திய முதல் பேரணிக்குப் பிறகு, தென்னிந்திய உணவகங்களின் மீது தாக்குதல் நடந்தது. இதற்குப் பிறகு, தென்னிந்தியர்கள் மீதான பால் தாக்கரேவின் விமர்சனங்கள் தொடர்ந்து நீடித்தன.

இதனால், ஆங்காங்கே சிவசேனா தொண்டர்கள் தாக்குதல்களை நடத்தினர். 1967 பிப்ரவரியில் மத்திய மும்பையில் ஒரு தென்னிந்திய உணவகம் மீது நடந்த தாக்குதலில் 32 பேர் காயமடைந்தனர்.

தற்போது மும்பையில் வசிக்கும் 91 வயதான சண்முகராஜா, 1950களின் துவக்கத்தில் வேலை தேடி மும்பை சென்றவர். பிறகு, அலுமினிய பாத்திர உற்பத்தித் தொழிற்சாலை ஒன்றில் வேலை பார்த்து வந்தார். 1960களின் மத்தியில் நடந்த சம்பவம் அவருக்கு நன்றாக நினைவிருக்கிறது.

சிவசேனா கட்சியின் நிறுவனர் பால் தாக்கரேவின் பேச்சு கவர்ச்சிகரமானதாக இருக்கும் எனக் கூறுகிறார் சண்முகராஜா. அதுகுறித்துப் பேசிய அவர், “1960களில் பம்பாயில் இருந்த எந்த நிறுவனத்தை எடுத்துக்கொண்டாலும் அதில் தமிழரோ, மலையாளியோதான் மேலதிகாரியாக இருப்பார்கள். கீழ்நிலையில் இருந்த தொழில்களிலும் பெரும்பாலும் தென்னிந்தியர்களே வேலை பார்த்தார்கள். அந்தத் தருணத்தில்தான் மராட்டியர்களுக்காக போராடத் தொடங்கினார் பால் தாக்கரே” என்றார்.

பட மூலாதாரம், Getty Images

படக்குறிப்பு, பால் தாக்கரே மற்றும் உத்தவ் தாக்கரேஅப்போது பால் தாக்கரே ஆற்றிய உரைகள் தற்போதும் நன்றாக நினைவிருப்பதாகக் கூறும் அவர் “நம்முடைய மாநிலமாக இருந்தும் நமக்கு இங்கே எதுவுமே இல்லை. காலையில் நீங்கள் தேநீர் அருந்த வேண்டுமானால், பாலை ஒரு மாநிலத்துக்காரனிடம் வாங்க வேண்டும். தேயிலையையும் சர்க்கரையையும் இன்னொரு மாநிலத்துக்காரனின் கடையில் வாங்க வேண்டும்.

ஹோட்டலுக்கு போனால், கன்னடரின் ஹோட்டலாக இருக்கிறது. இதையெல்லாம் முடித்துக்கொண்டு அலுவலகத்திற்குப் போனால், அங்கே நமக்கு மேலே மலையாளியோ, தமிழனோ உட்கார்ந்திருக்கிறான்’ என்று பேசுவார்” எனத் தெரிவித்தார்.

இதைக் கேட்டதும் எந்த மராட்டியருக்கும் இயல்பாகவே உணர்வு ஏற்படும் என்று தெரிவிக்கும் சண்முகராஜா, “தென்னிந்தியர்களை, குறிப்பாக தமிழர்களை அனைவரும் எதிர்க்க ஆரம்பித்தார்கள். சில இடங்களில் தமிழர்கள் மீது தாக்குதலும் நடந்தது” என்றார்.

“அந்தக் காலகட்டத்தில் சற்று அச்சமாக இருந்தாலும், பெரிய அளவில் ஆட்கள் திரும்பிச் செல்லவில்லையென்றே நினைக்கிறேன். அதற்கு முன்பாக வேட்டி கட்டிச் சென்றால், தென்னிந்தியர்கள் என ஒரு மரியாதை கலந்த அச்சம் இருக்கும். ஆனால், இந்த நிகழ்வுக்குப் பிறகு அது மாறிவிட்டது” என நினைவுகூர்கிறார் சண்முகராஜா.

படக்குறிப்பு, மும்பையில் செயல்படும் தமிழ் அறக்கட்டளையின் தலைவர் சு.குமணராசன்ஆனால், எல்லா உயர்மட்டப் பதவிகளிலும் தமிழரோ, மலையாளியோ இருப்பதை எதிர்த்து இந்தப் பிரசாரம் நடந்தாலும் கீழ்மட்டத் தொழிலாளர்களே அதிகம் அச்சமடைந்தனர் என்கிறார் மும்பையைச் சேர்ந்த தமிழ் அறக்கட்டளையின் தலைவர் சு.குமணராசன்.

“கடந்த 1960களில் மண்ணின் மைந்தர்கள் என்ற கோஷத்தை சிவசேனா முன்வைத்தது. அந்தக் காலகட்டத்தில் பம்பாயில் எல்லா நிறுவனங்களிலும் தென்னிந்தியர்கள் குறிப்பாக பிராமணர்கள் மேல்மட்டப் பதவிகளில் இருந்தனர். மராட்டியர்களுக்கான வேலைவாய்ப்பு என்பது மிகவும் குறைவாகவே இருந்தது.

மராட்டியர்களுக்கு வேலை வாய்ப்பு தேவை என்ற கோரிக்கையை முன்வைத்து தென்னிந்தியர்களை அவர்கள் குறிவைத்தனர். ஆனால், தென்னிந்தியர்களில் தமிழர்கள், மலையாளிகள், தெலுங்கர்கள், கன்னடர்கள் என எல்லோருமே மதராஸிகள் என்றுதான் அழைக்கப்பட்டனர்” என்கிறார் சு.குமணராசன்.

இதைத் தொடர்ந்து மகாராஷ்டிராவில் வட இந்தியவர்களின் குடியேற்றம் அதிகரித்ததாகக் குறிப்பிடுகிறார் குமணராசன்.

“ஏழெட்டு ஆண்டுகளுக்குப் பிறகு, தென்னிந்தியர்களுக்கு எதிரான போராட்டங்கள் குறையத் தொடங்கின. அதே நேரத்தில் மெல்ல மெல்ல தென்னிந்தியர்கள் மும்பையில் குடியேறுவது குறைந்து, வட இந்தியர்கள் குடியேற ஆரம்பித்தனர். இதனால், சிவசேனா 90களில் வட இந்தியர்களுக்கு எதிராக பிரசாரங்களை நடத்தியது. ஆனால், இதற்கு நடுவில் சிவசேனாவில் ஒரு மாற்றம் ஏற்பட்டது.

கடந்த 1980களில் இந்தியா முழுவதும் பா.ஜ.க. வளர ஆரம்பித்த காலத்தில் சிவசேனாவும் இந்துத்துவ பாதைக்குத் திரும்பியது. அதனுடைய கவனமெல்லாம் இந்துத்துவம், இந்துக்கள் என்பதை நோக்கி மாறியது. தென்னிந்தியர்களை இலக்காக்குவது என்பது இல்லாமல் போனது. தற்போது சிவசேனாவில், தென்னிந்தியர்கள் பல இடங்களில் நிர்வாகிகளாக இருக்கிறார்கள்” என்கிறார் குமணராசன்.

பட மூலாதாரம், Getty Images

படக்குறிப்பு, சிவசேனா மற்றும் பாஜகஇப்போது இந்திக்கு எதிராக சிவசேனா நடத்தும் போராட்டங்களுக்கும் 1960களில் தமிழர்களுக்கு எதிராக நடந்த போராட்டத்திற்கும் சற்று வித்தியாசம் இருப்பதாகக் கூறுகிறார் சண்முகராஜா.

“அந்தக் காலகட்டத்தில் மராட்டியர்கள் எந்த உயர் பதவியிலும் இல்லை. அவர்களுக்கான வேலைவாய்ப்புகளும் குறைவாகவே இருந்தது. பால் தாக்கரேவின் போராட்டம் இதில் மாற்றத்தை ஏற்படுத்தியது. நிறைய மராட்டியர்கள் படிக்க ஆரம்பித்தார்கள். வேலைகளைப் பெற்றார்கள். ஆனால், இப்போது நடக்கும் போராட்டம் சிவசேனாவுக்காக நடக்கும் போராட்டம்.

ஒரு காலகட்டத்தில் சிவசேனாவை நம்பியிருந்த பா.ஜ.க. தற்போது அந்தக் கட்சியையே உடைத்துவிட்டது. இப்போது இந்தியை முன்வைத்து, மீண்டும் தன்னைத் திரட்டுகிறது. தற்போது இங்கு ஏற்பட்டிருக்கும் இந்தி எதிர்ப்பு உணர்வுக்கு தமிழ்நாடும் ஒரு காரணம். அதை நிறைய பேர் சொல்கிறார்கள்” என்கிறார் சண்முகராஜா.

ஆனால், தமிழ்நாடு முதலமைச்சரின் தற்போதைய வாழ்த்தை வேறு விதமாகப் புரிந்துகொள்ள வேண்டும் என்கிறார் மூத்த பத்திரிகையாளரான ஏ.எஸ். பன்னீர்செல்வன்.

“மாநில உரிமைகளைப் பொறுத்த விவகாரங்களில் தமிழ்நாடு அரசு ஒரு முன்மாதிரியாகிவிட்டது. மாநில உரிமைகள் என்று வரும்போது மொழி உரிமை மிக முக்கியமான இடத்தை வகிக்கிறது. மராத்தி மொழி மிகத் துடிப்புமிக்க இலக்கியம், நாடகம், திரைப்படங்களைக் கொண்டது. ஆனால், காலம் செல்லச் செல்ல அவை ஒதுக்கப்பட்டுவிட்டன.

அப்படியிருக்கும் சூழலில், அந்த மொழிக்காக ஒரு போராட்டம் நடக்கும்போது, அதே குறிக்கோளைக் கொண்டவர்கள் ஆதரவளிப்பதில் என்ன தவறு இருக்க முடியும்?” என்று அவர் கேள்வியெழுப்புகிறார்.

அதோடு, “எல்லா கட்சிகளுக்கும் பரிணாம வளர்ச்சி உண்டு. சிவசேனா அதற்கு விதிவிலக்கல்ல. தற்போது அளிக்கும் வாழ்த்தும் ஆதரவும் மொழி என்ற விஷயத்தில்தான். ஆகவே மொழி உரிமையின் பன்முகத் தன்மைக்காக இணைவது என்பது முற்போக்கான ஒரு பார்வைதான்,” என்றார் ஏ.எஸ். பன்னீர்செல்வன்.

– இது, பிபிசிக்காக கலெக்டிவ் நியூஸ்ரூம் வெளியீடு