🏛️  இலங்கைக்கு செல்லும் IMF முகாமைத்துவ பணிப்பாளர் – Global Tamil News

சர்வதேச நாணய நிதியத்தின் (IMF) முகாமைத்துவ பணிப்பாளர் கிறிஸ்டலினா ஜார்ஜீவா (Kristalina Georgieva) அடுத்த மாதம் இலங்கைக்கு பயணம் மேற்கொள்ளவுள்ளமை உறுதிப்படுத்தப்பட்டுள்ளது. இலங்கையின் பொருளாதார மறுசீரமைப்புத் திட்டங்களை மதிப்பாய்வு செய்யவும், அண்மைய இயற்கை அனர்த்தங்களால் பாதிக்கப்பட்ட மக்களுக்கு ஆதரவைத் தெரிவிக்கவும் இந்த பயணம் அமையவுள்ளது. சமீபத்திய வெள்ளப்பெருக்கு மற்றும் அனர்த்தங்களால் பாதிக்கப்பட்ட மக்களுக்கு IMF-இன் முழுமையான ஆதரவைத் தெரிவிப்பதே இந்த பயணத்தின் முக்கிய நோக்கம் என ஆசிய-பசுபிக் திணைக்களப் பணிப்பாளர் கிருஷ்ணா சீனிவாசன் தெரிவித்தார். நேற்று (ஜனவரி 28) ஜனாதிபதி அனுர குமார திஸாநாயக்கவை சந்தித்த போது, “இலங்கையின் சீர்திருத்தத் திட்டங்களின் வெற்றியைப் பார்ப்பதற்கும், எங்களுடைய ஒற்றுமையை வெளிப்படுத்துவதற்கும் அவர் இங்கு வருவார்” என சீனிவாசன் உறுதியளித்தார். கொழும்புக்கு வெளியே பயணம் செய்த போது அரசாங்கத்தின் நிர்வாகச் சீர்திருத்தங்கள் மற்றும் ஊழல் எதிர்ப்பு நடவடிக்கைகளுக்குப் பொதுமக்களிடையே பெரும் வரவேற்பு இருப்பதை நேரில் கண்டதாக கிருஷ்ணா சீனிவாசன், குறிப்பிட்டார். வெள்ளத்தால் பாதிக்கப்பட்ட பகுதிகளைப் பார்வையிட்ட அவர், உயிரிழந்தவர்களுக்காகத் தனது ஆழ்ந்த அனுதாபங்களைத் தெரிவித்ததுடன், உடைந்த வீதிகளைப் புனரமைக்க வேண்டியதன் அவசியத்தையும் சுட்டிக்காட்டினார். நேற்று நடைபெற்ற ஜனாதிபதி அநுர குமார திஸாநாயக்கவுடன் நடைபெற்ற சந்திப்பின் போது, ‘நீடிக்கப்பட்ட நிதி வசதி’ (EFF) திட்டத்தின் கீழ் ஏற்கனவே கையெழுத்திடப்பட்ட ஒப்பந்தங்களில் எவ்வித மாற்றங்களும் செய்யப்பட மாட்டாது என IMF திட்டவட்டமாக அறிவித்துள்ளது. இலங்கைக்கு வழங்கப்பட வேண்டிய அடுத்த தவணை நிதி தொடர்பான உத்தியோகபூர்வ பேச்சுவார்த்தைகள் எதிர்வரும் மார்ச் மாதம் ஆரம்பிக்கப்படவுள்ளன. சர்வதேச பிணைமுறிதாரர்களுடன் (Bondholders) எட்டப்பட்ட கடன் மறுசீரமைப்பு உடன்படிக்கைகளை IMF முழுமையாக ஏற்றுக்கொண்டுள்ளது. இது இலங்கையின் கடன் சுமையைக் குறைப்பதற்கும், சர்வதேச முதலீட்டாளர்களின் நம்பிக்கையை மீண்டும் பெறுவதற்கும் வழிவகுத்துள்ளது. முகாமைத்துவ பணிப்பாளர் கிறிஸ்டலினா ஜார்ஜீவாவின் வருகையின் போது, அனர்த்தங்களுக்குப் பின்னரான மீட்சி (Disaster Recovery) மற்றும் காலநிலை நிதியுதவி (Climate Finance) தொடர்பான புதிய ஒத்துழைப்பு திட்டங்கள் குறித்து ஆலோசிக்கப்படும் என எதிர்பார்க்கப்படுகிறது. திறைசேரியில் உபரி நிதியை (Treasury Surplus) பேணியமைக்காக இலங்கையைப் பாராட்டியுள்ள IMF, இதே நிதி ஒழுக்கத்தை எதிர்வரும் காலங்களிலும் கடைப்பிடிக்க வலியுறுத்தியுள்ளது. Tag Words: #IMF #SriLankaEconomy #KristalinaGeorgieva #AnuraKumara #EconomicReforms #DebtRestructuring #LKA #BreakingNews2026 #GlobalSupport #Solidarity