Archive - January 27, 2026

ஈராக் மற்றும் ஏமனில் செயல்படும் ஈரான் ஆதரவு பெற்ற ஆயுதக்குழுக்கள் புதிய தாக்குதல்களை நடத்தப்போவதாக வெளியிட்டுள்ள கடுமையான எச்சரிக்கைகள், மத்திய கிழக்கை மீண்டும் தீவிர பதற்ற நிலைக்குள் தள்ளியுள்ளது. அமெரிக்காவின் பிரம்மாண்ட விமானம் தாங்கி போர்க்கப்பல் – யுஎஸ்எஸ் ஆபிரகாம் லிங்கன் உள்ளிட்ட போர்க்கப்பல்கள் இப்பகுதிக்கு வந்தடைந்துள்ள நிலையில் இந்த எச்சரிக்கைகள் வெளியாகியுள்ளன. குறிப்பாக, ஏமனின் ஹூதி கிளர்ச்சியாளர்கள் செங்கடல் பகுதியில் செல்லும் சர்வதேச வர்த்தகக் கப்பல்கள் மீது மீண்டும் தாக்குதல்கள் நடத்தத் தயாராக இருப்பதை உணர்த்தும் வகையில், தங்களது முந்தைய தாக்குதல் வீடியோக்களை சமூக ஊடகங்களில் வெளியிட்டுள்ளனர். இது உலக வர்த்தகப் பாதைகளுக்கே நேரடியான அச்சுறுத்தலாக பார்க்கப்படுகிறது. அதேபோல், ஈராகில் மிக சக்திவாய்ந்த ஆயுத அமைப்பாகக் கருதப்படும் கதாயிப் ஹிஸ்புல்லா அமைப்பின் தலைவர் அபு ஹுசைன் அல்-ஹமிதாவி,“ஈரான் மீது ஏதேனும் தாக்குதல் நடத்தப்பட்டால், அது இப்பகுதியில் ஒரு முழு அளவிலான போராக வெடிக்கும். எதிரிகள் மரணத்தின் கசப்பான வடிவத்தை ருசிப்பார்கள்” என்று கடுமையாக எச்சரித்துள்ளார். இந்த நிலையில், ஈரானில் அரசுக்கு எதிராக நடைபெறும் போராட்டங்களில் இதுவரை 6,000-க்கும் மேற்பட்டோர் கொல்லப்பட்டு உள்ளதாக மனித உரிமை அமைப்புகள் தெரிவிக்கின்றன. இதனை முன்னிட்டு, அமெரிக்க அதிபர் டொனால்ட் டிரம்ப் ஏற்கனவே “இந்த வன்முறைகளுக்கு எதிராக ராணுவ நடவடிக்கை எடுக்கப்படும்” என்று அறிவித்திருந்தார். அதன் தொடர்ச்சியாகவே, அமெரிக்க மத்திய கட்டளை (CENTCOM) இந்தப் பகுதியில் தனது ராணுவ இருப்பை பலப்படுத்தியுள்ளது. இதற்குப் பதிலடியாக, லெபனான், ஏமன், ஈராக், சிரியா ஆகிய நாடுகளில் உள்ள தன் ஆதரவு ஆயுதக் குழுக்களை ஒருங்கிணைக்கும் “எதிர்ப்பு அச்சு” (Axis of Resistance) மூலம் அமெரிக்கா மற்றும் இஸ்ரேலுக்கு எதிராக நேரடி மோதலில் ஈடுபடப்போவதாக ஈரான் எச்சரித்துள்ளது. இந்த வளர்ச்சிகள் அனைத்தும் சேர்ந்து, மத்திய கிழக்கில் ஒரு பிராந்திய அளவிலான பெரும் போர் வெடிக்கும் அபாயம் உருவாகி வருவதாக சர்வதேச அரசியல் ஆய்வாளர்கள் எச்சரிக்கின்றனர். இது ஒரு நாடுகளுக்கிடையேயான போராக மட்டும் இல்லாமல், ஆயுதக் குழுக்கள் – வல்லரசுகள் – உலக வர்த்தக பாதைகள் ஆகிய அனைத்தையும் உள்ளடக்கிய ஒரு சிக்கலான மோதலாக மாறும் அபாயம் உள்ளது. ________________________________________

யாழ்ப்பாணத்திற்கு பயணம் மேற்கொண்டுள்ள இலங்கை மற்றும் மாலைதீவுகளுக்கான கனேடிய உயர்ஸ்தானிகர் இசபெல் மார்ட்டீன் இன்றைய தினம் செவ்வாய்க்கிழமை ஜனநாயக தமிழ் தேசிய கூட்டணியினரை சந்தித்து கலந்துரையாடினார். யாழ். நகரில் உள்ள தனியார் விடுதியில் ஜனநாயக தமிழ் தேசிய கூட்டணியில் அங்கம் வகிக்கும் அரசியல் கட்சிகளின் தலைவர்கள் , செயலாளர்களை சந்தித்து கலந்துரையாடியுள்ளார். சுமார் 2 மணி நேரத்திற்கு மேலாக நடைபெற்ற கலந்துரையாடலில் தற்போதைய அரசாங்கத்தின் அணுகு முறைகள் , அரசியல் நிலைப்பாடுகள் , எதிர்கால அரசியல் நகர்வுகள் குறித்து விரிவாக கலந்துரையாடப்பட்டதாக அறிய முடிகிறது. Spread the love  இலங்கைக்கான கனேடிய உயர்ஸ்தானிகர்கனேடிய உயர்ஸ்தானிகர்ஜனநாயக தமிழ் தேசிய கூட்டமைப்பு

பிரிட்டன் பிரதமர் கியர் ஸ்டார்மர் (Keir Starmer) வரும் செவ்வாய்க்கிழமை சீனாவுக்கு அதிகாரப்பூர்வ விஜயம் மேற்கொள்ள உள்ளார். இது கடந்த 8 ஆண்டுகளில் சீனாவைச் சந்திக்கும் முதல் பிரிட்டன் பிரதமர் என்ற முக்கியத்துவம் கொண்டது. இந்த விஜயத்தின் முக்கிய நோக்கமாக, சீனாவுடன் சீர்குலைந்துள்ள இருதரப்பு உறவுகளை சீரமைத்தல், வர்த்தகம், முதலீடு, காலநிலை மாற்றம் போன்ற துறைகளில் ஒத்துழைப்பை அதிகரித்தல், மேலும், அமெரிக்காவை மட்டுமே சார்ந்திருக்கும் வெளிநாட்டு கொள்கையிலிருந்து பிரிட்டன் சிறிதளவு விலகும் முயற்சி எனவும் அரசியல் ஆய்வாளர்கள் பார்க்கின்றனர். முன்னதாக, மனித உரிமைகள், ஹொங்காங், உளவுத்துறை குற்றச்சாட்டுகள் போன்ற விவகாரங்களில் இரு நாடுகளுக்கிடையிலான உறவுகள் கடுமையாக பாதிக்கப்பட்டிருந்தன. இந்த நிலையில், ஸ்டார்மர் தலைமையிலான புதிய தொழிலாளர் அரசு (Labour Government) நடைமுறை சார்ந்த (pragmatic) வெளிநாட்டு கொள்கையை முன்னெடுக்க முயற்சிப்பதாக இந்தப் பயணம் கருதப்படுகிறது. உலக அரசியலில் சக்தி சமநிலைகள் மாறிவரும் சூழலில், பிரிட்டன்–சீனா உறவுகள் புதிய கட்டத்துக்குள் நுழையுமா? இது அமெரிக்கா–பிரிட்டன் உறவுகளில் மாற்றத்தை ஏற்படுத்துமா?என்பவை கவனிக்கத்தக்க கேள்விகளாக உள்ளன. ________________________________________

கனடாவின் பிரதமர் மார்க் கார்னி (Mark Carney) எதிர்வரும் மார்ச் மாதம் இந்தியாவில் அரசுமுறைப் பயணம் மேற்கொள்ள உள்ளார். இரு நாடுகளுக்கும் இடையிலான உறவை வலுப்படுத்தும் நோக்கில் அமையவுள்ள இந்தப் பயணத்தின் போது பல முக்கிய துறைகளில் வரலாற்றுச் சிறப்புமிக்க ஒப்பந்தங்கள் கையெழுத்தாக உள்ளன. ⚛️ இந்தியாவின் அணுசக்தித் தேவைக்காக சுமார் 2.8 பில்லியன் டாலர் மதிப்பிலான 10 ஆண்டு கால யுரேனியம் விநியோக ஒப்பந்தம் கையெழுத்தாக வாய்ப்புள்ளது. 🔋 கச்சா எண்ணெய், இயற்கை எரிவாயு (LNG) மற்றும் முக்கிய கனிமங்கள் (Critical Minerals) தொடர்பான புதிய வர்த்தக உடன்படிக்கைகள், AI மற்றும் குவாண்டம் கம்ப்யூட்டிங் போன்ற அதிநவீன தொழில்நுட்பத் துறைகளில் இரு நாடுகளும் இணைந்து செயல்படத் திட்டமிட்டுள்ளன. 🤖 📈 2030-ஆம் ஆண்டிற்குள் இருதரப்பு வர்த்தகத்தை 50 பில்லியன் டாலராக உயர்த்தும் இலக்குடன் ‘விரிவான பொருளாதாரக் கூட்டாண்மை ஒப்பந்தம்’ (CEPA) குறித்த பேச்சுவார்த்தைகள் மீண்டும் தொடங்கப்பட உள்ளன. அமெரிக்காவைத் தாண்டி தனது வர்த்தகக் கூட்டணிகளை விரிவுபடுத்தும் நோக்கில் மார்க் கார்னி மேற்கொள்ளும் இந்தப் பயணம், ஆசிய பிராந்தியத்தில் இந்தியா – கனடா இடையிலான புதிய சகாப்தத்தின் தொடக்கமாகப் பார்க்கப்படுகிறது. #CanadaIndia #MarkCarney #TradeDeal #Uranium #AI #EnergySector #IndiaNews #BilateralRelations #GlobalTrade #TamilNews #கனடா #இந்தியா #வர்த்தகம்

கூகுள் நிறுவனம் தனது பயனர்களின் உரையாடல்களை ரகசியமாகக் கேட்டதாகக் கூறப்படும் வழக்கில், தற்போது 68 மில்லியன் டாலர் (சுமார் ₹570 கோடி) இழப்பீடு வழங்க ஒப்புக்கொண்டுள்ளது. 🔍  கூகுள் அசிஸ்டண்ட் (Google Assistant) வசதி கொண்ட சாதனங்கள், பயனர்கள் “Hey Google” அல்லது “OK Google” என்று சொல்லாத நேரங்களிலும், பின்னணியில் நடக்கும் உரையாடல்களைப் பதிவு செய்ததாகப் புகார் எழுந்தது. 💡 சாதாரணப் பேச்சுகளைக் கூட ‘வேக் வேர்ட்ஸ்’ (Wake words) எனத் தவறாகப் புரிந்துகொண்டு கூகுள் அசிஸ்டண்ட் செயல்படத் தொடங்கியுள்ளது. இவ்வாறு ரகசியமாகப் பதிவு செய்யப்பட்ட தகவல்கள், பயனர்களுக்குத் Targeted Ads (குறிவைக்கப்பட்ட விளம்பரங்கள்) காட்ட பயன்படுத்தப்பட்டதாகக் குற்றம் சாட்டப்பட்டது. 2016 மே மாதம் முதல் கூகுள் சாதனங்களைப் பயன்படுத்தியவர்கள் இந்தத் தீர்வின் மூலம் பயனடைய வாய்ப்புள்ளது. தனது மென்பொருள் தவறுதலாகச் செயல்பட்டிருக்கலாமே தவிர, திட்டமிட்டு உளவு பார்க்கவில்லை என கூகுள் தரப்பில் கூறப்பட்டாலும், நீண்டகால சட்டப் போராட்டத்தைத் தவிர்க்க இந்தத் தொகையைச் செலுத்த முன்வந்துள்ளது. தொழில்நுட்ப நிறுவனங்கள் நமது அந்தரங்கத் தரவுகளைக் கையாள்வதில் இன்னும் கூடுதல் வெளிப்படைத்தன்மை தேவை என்பதை இந்தச் சம்பவம் உணர்த்துகிறது. உங்கள் போனில் ‘Hey Google’ வசதியை ஆஃப் செய்து வைத்துள்ளீர்களா? உங்கள் கருத்துக்களைக் கமெண்டில் பகிருங்கள்! 👇 #Google #Privacy #DataSecurity #TechNews #GoogleAssistant #TamilNews #CyberSecurity #PrivacyMatters #SmartDevices #GoogleSettlement

யாழ்ப்பாணத்தில் சட்டவிரோதமான முறையில் சாராய விற்பனையில் ஈடுபட்ட நபர் ஒருவர் கைது செய்யப்பட்டுள்ளார். அராலி பகுதியில் ஒருவர் சட்டவிரோதமாக சாராய விற்பனையில் ஈடுபடுவதாக  காவல்துறைப் புலனாய்வு பிரிவினருக்கு கிடைத்த ரகசிய தகவலின் அடிப்படையில் குறித்த நபரை கைது செய்துள்ளனர். கைது செய்யப்பட்டவரிடம் இருந்து 21 கால்போத்தல் சாராயம் மீட்கப்பட்டுள்ளது. ஒரு கால் போத்தல் சாரயத்தை ஆயிரம் ரூபாய் வீதம் விற்பனை செய்து வந்ததாக காவல்துறையினர் தெரிவித்துள்ளனர். கைது செய்யப்பட்ட நபரை வட்டுக்கோட்டை காவல் நிலையத்தில் தடுத்து வைத்து காவல்துறையினர் விசாரணைகளை முன்னெடுத்துள்ளனர்.