இயக்குனர் ஐஸ்வர்யா ரஜினிகாந்த் இயக்கத்தில் தனுஷ் மற்றும் ஸ்ருதி ஹாசன் நடிப்பில் கடந்த 2012 ஆம் ஆண்டு வெளியாகி பெரும் தாக்கத்தை ஏற்படுத்திய ‘3’ திரைப்படம் மீண்டும் திரையரங்குகளில் வெளியாகவுள்ளது. எதிர்வரும் பெப்ரவரி 6 ஆம் திகதி இத்திரைப்படம் உலகளாவிய ரீதியில் மீள் வெளியீடு (Re-release) செய்யப்படவுள்ளதாக சோனி மியூசிக் சவுத் இந்தியா நிறுவனம் உத்தியோகபூர்வமாக அறிவித்துள்ளது.
காதலர் தினத்தை முன்னிட்டு வெளியாகும் இந்தப் படம், அன்றைய காலகட்டத்தில் இளைஞர்கள் மத்தியில் பெரும் வரவேற்பைப் பெற்றது. குறிப்பாக அனிருத் ரவிச்சந்தரின் இசையில் வெளியான ‘வை திஸ் கொலவெறி டி’ (Why This Kolaveri Di) பாடல் உலகப் புகழ்பெற்றதுடன், அனிருத்தின் இசைப் பயணத்திற்கு ஒரு பலமான அடித்தளமாக அமைந்தது. தற்போதும் இந்தப் படத்தின் பாடல்கள் மற்றும் தனுஷின் நடிப்பு சமூக வலைத்தளங்களில் வைரலாகி வரும் நிலையில், இந்த மீள் வெளியீடு இரசிகர்களுக்கு ஒரு சிறந்த விருந்தாக அமையும் என எதிர்பார்க்கப்படுகிறது.
ஒரு தீவிரமான காதல் மற்றும் உளவியல் ரீதியான திரில்லர் கதையைக் கொண்ட இந்தப் படம், தனுஷின் திரைப்பயணத்தில் மிகச்சிறந்த நடிப்பை வெளிப்படுத்திய படங்களில் ஒன்றாகக் கருதப்படுகிறது. இதற்கான ட்ரைலர் நாளைய தினம் வெளியிடப்படவுள்ளதாகவும் அறிவிக்கப்பட்டுள்ளது. தனுஷ் தற்போது தனது 50ஆவது படமான ‘ராயன்’ வெற்றியையும், தனது அடுத்தடுத்த இயக்கப் பணிகளையும் கவனித்து வரும் சூழலில், அவரது பழைய கிளாசிக் திரைப்படம் திரைக்கு வருவது இரசிகர்களை உற்சாகப்படுத்தியுள்ளது.
இலங்கையில் தனுஷிற்கு பாரிய இரசிகர் பட்டாளம் உள்ள நிலையில், யாழ்ப்பாணம் மற்றும் கொழும்பு உள்ளிட்ட பிரதான நகரங்களில் உள்ள திரையரங்குகளில் இந்தப் படத்தை வெளியிடுவதற்கான ஏற்பாடுகள் முன்னெடுக்கப்பட்டு வருகின்றன. 2012இல் மிஸ் செய்த பல இளைய தலைமுறையினர் இந்தப் படத்தை பெரிய திரையில் காண்பதற்கு ஆர்வமாக உள்ளனர்.
