🚨யாழ். போதனா வைத்தியசாலையில் பரபரப்பு: – Global Tamil News

🚨யாழ். போதனா வைத்தியசாலையில் பரபரப்பு: போதையில் சென்றவர் பாதுகாப்பு உத்தியோகஸ்தரை கத்தியால் வெட்டிவிட்டு தப்பியோட்டம்! 🏥 by admin January 14, 2026 written by admin January 14, 2026 யாழ்ப்பாணம் போதனா வைத்தியசாலையில் இன்று அதிகாலை சிகிச்சைக்காக சென்ற நபர் ஒருவர், அங்கிருந்த பாதுகாப்பு உத்தியோகஸ்தர் மீது கத்திக்குத்து தாக்குதல் நடத்திவிட்டு தப்பியோடியுள்ள சம்பவம் பெரும் அதிர்ச்சியை ஏற்படுத்தியுள்ளது. இன்று அதிகாலை சுமார் 1.40 மணியளவில் மதுபோதையில் இரத்தக் காயங்களுடன் நபர் ஒருவர் சிகிச்சைக்காக யாழ். போதனா வைத்தியசாலையில் அனுமதிக்கப்பட்டார். அவர் மேலதிக சிகிச்சைக்காக 24ஆம் இலக்க விடுதியில் தங்கவைக்கப்பட்டார். விடுதியில் அனுமதிக்கப்பட்ட அந்த நபர், அங்கு கடமையில் இருந்த தாதிய உத்தியோகஸ்தர்களுடன் தேவையற்ற முறையில் முரண்பட்டதுடன், மிகவும் கீழ்த்தரமான வார்த்தைகளால் தூஷணப் பிரயோகம் செய்துள்ளார். இதனால் அங்கிருந்த ஏனைய நோயாளர்களும் மிகுந்த சிரமத்திற்கு உள்ளாகினர். நிலைமை கட்டுப்பாட்டை மீறிச் சென்றதால், விடுதி ஊழியர்கள் பாதுகாப்பு உத்தியோகஸ்தர்களுக்கு தகவல் வழங்கினர். விரைந்து வந்த பாதுகாப்பு உத்தியோகஸ்தர்கள் அவரை கட்டுப்படுத்த முயன்றபோது, அவர் தனது உடமையில் மறைத்து வைத்திருந்த கத்தியை எடுத்து அச்சுறுத்தியுள்ளார். பாதுகாப்பு உத்தியோகஸ்தர்கள் அவரை மடக்கிப் பிடிக்க முற்பட்ட வேளையில், அவர் கத்தியால் தாக்கியதில் ஒரு பாதுகாப்பு உத்தியோகஸ்தரின் கையில் பலத்த காயம் ஏற்பட்டுள்ளது. தாக்குதலை நடத்திய நபர் உடனடியாக அவ்விடத்திலிருந்து தப்பியோடியுள்ளார். இந்த வன்முறைச் சம்பவம் தொடர்பாக யாழ்ப்பாணப் காவல்  நிலையத்தில் முறைப்பாடு செய்யப்பட்டுள்ளது. தப்பியோடிய சந்தேக நபரை கைது செய்வதற்கான விசாரணைகளை காவற்துறையினர் முன்னெடுத்து வருகின்றனர். வைத்தியசாலை போன்ற பாதுகாப்பான இடங்களில் இவ்வாறான வன்முறைகள் இடம்பெறுவது ஊழியர்கள் மற்றும் நோயாளர்கள் மத்தியில் அச்சத்தை ஏற்படுத்தியுள்ளது. #Jaffna #HospitalAttack #JaffnaTeachingHospital #CrimeNews #SafetyAlert #JaffnaPolice #SrilankaNews #யாழ்ப்பாணம் #யாழ்_போதனா_வைத்தியசாலை #கத்திக்குத்து