டாலர் மதிப்பு சரிவதை விரும்பும் டிரம்ப் – பின்னணியில் பொருளாதார காரணம் என்ன?

பட மூலாதாரம், Getty Images

படக்குறிப்பு, டொனால்ட் டிரம்பின் படம் இடம்பெற்றுள்ள 100 டாலர் நோட்டின் இந்த பிரதியை, 2023-ல் மெரிலாண்ட் மாநிலத்தின் நேஷனல் ஹார்பரில் நடைபெற்ற மாநாட்டில் காட்சிக்கு வைத்திருந்தனர்.எழுதியவர், சிசிலியா பரேயாபதவி, பிபிசி உலக சேவை ஒரு மணி நேரத்துக்கு முன்னர்

தொடர்ந்து டாலரின் மதிப்பு சரிந்து வருகிறது.

இந்த ஆண்டு ஜனவரியில் டொனால்ட் டிரம்ப் மீண்டும் அதிபராகப் பதவியேற்றார்.

அதனையடுத்து தொடங்கிய வர்த்தகப் போரின் காரணமாக அதிகரித்து வரும் பதற்றங்களுக்கு மத்தியில், அமெரிக்க நாணயமான டாலரின் மதிப்பு தொடர்ந்து சரிந்து வருகிறது.

கடந்த மே மாதத்தில் தொடர்ந்து மூன்றாவது மாதமாக, அமெரிக்க தொழில்துறையின் உற்பத்தி சரிந்ததை அடுத்து, இந்த வாரம் டாலரின் மதிப்பு மேலும் சரிந்தது.

இதனால் டாலரின் மதிப்பு 2023 க்குப் பிறகு மிகக் குறைந்த அளவை எட்டியுள்ளது.

Skip அதிகம் படிக்கப்பட்டது and continue reading

அதிகம் படிக்கப்பட்டது

End of அதிகம் படிக்கப்பட்டது

அதிகரித்து வரும் வர்த்தகப் போர் மற்றும் உலகின் மிகப்பெரிய பொருளாதாரம் பலவீனமடைவது தொடர்பான கவலைகளுக்கு மத்தியில், எதிர்காலத்தில் டாலர் மேலும் வீழ்ச்சியடையும் என்று மோர்கன் ஸ்டான்லி, ஜேபி மோர்கன் மற்றும் கோல்ட்மேன் சாக்ஸ் போன்ற சில முதலீட்டு வங்கிகள் கணித்துள்ளன.

“டிரம்பின் பாதுகாப்புவாதமும் , நிலையற்ற தன்மையும் கொண்ட கொள்கைகளால் டாலர் மதிப்பு குறைந்து வருகிறது. இவை அமெரிக்காவின் நம்பகத்தன்மையை சேதப்படுத்துகின்றன”

என மெக்சிகோவை தளமாகக் கொண்ட நிதிக் குழுவான க்ரூபோ ஃபைனான்சிரோவின் பொருளாதார ஆய்வாளர் இயக்குனர் கேப்ரியெலா சில்லர் பிபிசி முண்டோவிடம் தெரிவித்தார்.

படக்குறிப்பு, பிபிசி தமிழ் வாட்ஸ்ஆப் சேனலில் இணைய இங்கே கிளிக் செய்யவும்.சில்லரின் கூற்றுப்படி, அதிபர் டிரம்பின் முடிவுகள் அமெரிக்காவின் வளர்ச்சி வாய்ப்புகளைத் தடை செய்கின்றன.

மேலும், “பாதுகாப்பான முதலீடு” என்றும், உலகின் முன்னணி கையிருப்பு நாணயமாகவும், டாலரைக் காணும் நிலை குறித்த கேள்விகளை எழுப்புகின்றன.

டாலரின் மதிப்பு தொடர்ந்து சரிந்து வருவதன் விளைவாக, அமெரிக்க ஏற்றுமதிகளுக்கு சர்வதேச சந்தைகளில் அதிக போட்டி ஏற்படுகிறது.

ஏனென்றால், அவை வெளிநாட்டு சந்தைகளில் மலிவாகக் கிடைக்கின்றன.

அதே நேரத்தில், இறக்குமதி செய்யப்பட்ட பொருட்கள் அமெரிக்காவில் அதிக விலை கொண்டதாக மாறுகின்றன.

இந்தக் காரணத்தினால், டாலரின் மதிப்புக் குறைவதன் காரணமாக, இறக்குமதி செய்யப்படும் பொருட்களின் விலை உயர்வு மற்றும் அதன் விளைவாக ஏற்படும் பணவீக்கத்தின் காரணமாக அமெரிக்க மத்திய வங்கியான பெடரல் ரிசர்வ் வங்கி, வட்டி விகிதங்களைக் குறைக்கத் தயங்கக்கூடும்.

டாலரின் சமீபத்திய சரிவு உண்மையில் மிகவும் தீவிரமான ஒன்றைக் குறிக்கிறது என்று பல பொருளாதார வல்லுநர்கள் கவலை தெரிவிக்கிறார்கள்.

அதாவது அமெரிக்கா மீதான உலக நாடுகளின் நம்பிக்கை குறைந்து வருகிறது.

“உலகம் டாலரின் மீது கொண்ட நம்பிக்கையும், அதன் மீதான சார்புத் தன்மையும், கடந்த அரை நூற்றாண்டுக்கு மேலாக உருவாகியுள்ளது. ஆனால் அந்த நம்பிக்கை ஒரு நொடியில் இழக்கப்படலாம்,”என்று பெர்க்லியில் உள்ள கலிபோர்னியா பல்கலைக்கழகத்தின் பொருளாதார நிபுணர் பாரி ஐச்சென்கிரீன் ஏப்ரல் மாத இறுதியில் கூறினார்.

டிரம்ப் ஏன் பலவீனமான டாலரை விரும்புகிறார்?

பட மூலாதாரம், Getty Images

படக்குறிப்பு, அமெரிக்காவில் உற்பத்தித் துறை வேகமாக வளர வேண்டும் என்று அதிபர் டிரம்ப் விரும்புகிறார்.வரலாற்று ரீதியாக, அமெரிக்க அரசாங்கங்கள் பல ஆண்டு காலமாக வலுவான டாலருக்குத் துணைநின்று வருகின்றன.

ஏனெனில், அது அமெரிக்காவின் கடன் செலவுகளை குறைத்து, உலக அரங்கில் நாட்டின் சக்தி, நம்பகத்தன்மை ஆகியவற்றின் அடையாளமாக விளங்குகிறது.

இது அமெரிக்க நட்பு நாடுகள் அல்லாத இரான், ரஷ்யா மற்றும் வெனிசுலா போன்ற நாடுகளின் மீது அழுத்தம் கொடுக்க உதவுகிறது.

ஏனெனில், இது அவர்களுக்கு டாலர் பெறுவதற்கு தடையாக விளங்குவதால், உலகிலுள்ள மற்ற நாடுகளுடன் வணிகம் நடத்துவது அவர்களுக்கு கடிமாகிறது.

அமெரிக்காவில் பொருளாதார நெருக்கடியின் போது கூட, உலகின் பிற நாடுகளில் டாலருக்கான தேவை தொடர்ந்து நீடித்தது.

ஆனால் டிரம்ப் நிர்வாகம் வேறுபட்ட சிந்தனையைக் கொண்டிருப்பதாக சில ஆய்வாளர்கள் நம்புகிறார்கள்.

அமெரிக்காவில் அவர் கொண்டு வர விரும்பும் தொழில்துறை மறுமலர்ச்சிக்கு டாலரின் வலிமை தடையாக இருப்பதாக அதிபர் நம்புவதாக தகவல்கள் தெரிவிக்கின்றன.

உற்பத்தித் துறை, அதன் “சிறந்த காலத்துக்கு” திரும்புவதற்கு ஒரு பலவீனமான டாலர் உதவியாக இருக்கும்.

“டிரம்ப் வலுவான டாலரை விரும்பவில்லை, ஏனெனில் அது இறக்குமதியை அதிகரிக்கிறது,” என்கிறார் சில்லர்.

டிரம்பின் பார்வையில், உள்நாட்டு உற்பத்தியை அதிகரிக்கவும், புதிய வேலை வாய்ப்புகளை உருவாக்கவும், ஏற்றுமதியை அதிகரிக்கவும், வர்த்தக பற்றாக்குறையைக் குறைக்கவும் நாட்டிற்கு பலவீனமான டாலர் தேவை.

அதிகாரப்பூர்வமற்ற சில அறிக்கைகள் ‘மார்-எ-லாகோ ஒப்பந்தம்’ என்று அழைக்கப்படும் ஒரு திட்டத்தைக் குறிப்பிடுகின்றன.

இது டிரம்பின் பொருளாதார ஆலோசகர் ஸ்டீபன் மிரானால் முன்மொழியப்பட்டது.

சந்தேகம் மற்றும் விமர்சனம்

டாலர் உலகின் இருப்பு நாணயமாக இருப்பது ஒரு நன்மை அல்ல.

அது அமெரிக்கத் தொழில்துறையின் உற்பத்தித்திறனைக் குறைக்க உதவிய விலையுயர்ந்த சுமை என்ற கருத்தை அடிப்படையாகக் கொண்டது தான் இந்த ‘மார்-எ-லாகோ ஒப்பந்தம்’ எனும் திட்டம்.

இந்த தர்க்கத்தின்படி, டாலருக்கான உலகளாவிய தேவை அதன் மதிப்பை உயர்த்துகிறது, இதனால் அமெரிக்கத் தயாரிப்புகள் அதிக விலை கொண்டவையாக மாறுகின்றன.

இது வர்த்தக பற்றாக்குறையை உருவாக்கி, உற்பத்தி நிறுவனங்கள் தங்கள் உற்பத்தி அலகுகளை வெளிநாடுகளுக்கு நகர்த்த ஊக்குவிக்கிறது.

இதன் விளைவாக உள்ளூரில் வேலை இழப்பு ஏற்படுகிறது.

“மிரானின் திட்டம், புத்திசாலித்தனமாகத் தோன்றினாலும், பிரச்னைக்கு ஒரு தீர்வாகாது” என்கிறார் ஹார்வர்ட் பல்கலைக்கழக பொருளாதார நிபுணரும் ஐஎம்எஃப் – இன் முன்னாள் தலைமைப் பொருளாதார நிபுணருமான கென்னத் ரோகாஃப்.

உலகம் முழுவதும், டாலர் இருப்பு நாணயமாக ஒரு பங்கைக் கொண்டுள்ளது என்று ரோகாஃப் நம்புகிறார்.

ஆனால் அமெரிக்காவின் வளர்ந்து வரும் வர்த்தக பற்றாக்குறைக்கான பல காரணங்களில் இதுவும் ஒன்று என்பதும் உண்மை.

மேலும் வர்த்தக பற்றாக்குறைக்கு பல காரணங்கள் இருந்தால், அதற்கு சுங்கவரிகளே தீர்வாகும் எனக் கருதுவதும் சரியாகாது.

அமெரிக்க டாலரின் மதிப்பு சுதந்திரமாக மாறுகிறது { உலகளாவிய வழங்கல் மற்றும் தேவையின் அடிப்படையில் மாறுகிறது (மாற்று விகிதங்கள்-exchange rates) } என்பதால் டாலரின் மதிப்பை நேரடியாகக் கட்டுப்படுத்தும் அதிகாரம் எந்த அதிபருக்கும் இல்லை என்பதை இங்கே குறிப்பிடுவது அவசியம்.

முதலீட்டாளர்கள் டாலர்களை வாங்கி விற்கும் உலகளாவிய நாணயச் சந்தையால், அதன் மதிப்பு தீர்மானிக்கப்படுகிறது.

அதனால், அமெரிக்காவால் நாணயத்தின் மதிப்பை நேரடியாக உயர்த்தவோ குறைக்கவோ முடியாது.

ஆயினும்கூட, அமெரிக்க அரசாங்கத்தின் பொருளாதாரக் கொள்கைகள் சந்தைக்கு சமிக்ஞைகளை அனுப்புகின்றன.

அவை டாலரின் மதிப்பு மற்றும் வட்டி விகிதங்கள் போன்ற பிற காரணிகளைப் பாதிக்கின்றன.

நுட்பமான சமநிலை

இவை அனைத்தும் ஒரு நுட்பமான இயந்திரத்தைப் போல வேலை செய்கின்றன, இதில் ஒரு பகுதி நகர்ந்தால், மற்ற பகுதிகளும் பாதிக்கப்படுகின்றன.

ஏப்ரல் மாதத்தில், அடிக்கடி மாறிவரும் சுங்கவரி தொடர்பான டிரம்பின் அறிவிப்புகள் முதலீட்டாளர்களின் நம்பிக்கையைக் குறைத்து, பணம் திரட்டுவதற்காக அரசாங்கம் வெளியிடும் அமெரிக்கப் பத்திரங்களைப் பாதித்தன. அந்த நேரத்தில் தான் இவ்வாறான சூழல் ஏற்பட்டது.

இந்த நம்பிக்கையின்மை டாலருக்கும் நல்லதல்ல.

ஆனால், இது ஒரு தற்காலிக மாற்றம் என்றும், நிரந்தரமானது அல்ல என்றும் சில ஆய்வாளர்கள் நம்புகிறார்கள்.

“யுவான், பிட்காயின் அல்லது தங்கம் போன்ற டாலருக்கான தேவையை மாற்றுவதற்குப் போதுமான அளவு வேறு எந்த நாணயமோ அல்லது சொத்தோ இல்லை”,

“இப்போது வேறு மாற்று இல்லை” என்று மிசுஹோ ஃபைனான்சியலின் பொருளாதார நிபுணர் ஸ்டீவ் ரிச்சியுடோ அசோசியேட்டட் பிரஸ்ஸிடம் தெரிவித்தார்.

வரிகளின் காரணமாகவோ அல்லது டாலரின் மதிப்பு வீழ்ச்சியடைந்து வருவதனாலோ, இறக்குமதி செய்யப்படும் பொருட்களுக்கு அதிக விலை கொடுக்க வேண்டியிருப்பதால், பணவீக்கம் உயரும் அபாயம் இருப்பதாக அமெரிக்கர்கள் கவலை கொண்டுள்ளனர்.

டிரம்பின் வர்த்தகக் கொள்கை, பட்ஜெட் மற்றும் வரி குறைப்புக்கள் (தற்போது அமெரிக்க நாடாளுமன்றத்தில் விவாதப் பொருளாக உள்ளது), பணவீக்கம் மற்றும் வட்டி விகிதங்கள் டாலரில் எத்தகைய தாக்கத்தை ஏற்படுத்தும் என்பதை வரும் மாதங்களில் பொறுத்திருந்து தான் பார்க்க வேண்டும்.

தற்போது நம்மிடம் கேள்விகள் அதிகமாகவும், பதில்கள் குறைவாகவும் உள்ளன.

இருப்பினும் வால் ஸ்ட்ரீட் மதிப்பீடுகளின்படி, டாலரின் மதிப்பு விரைவில் வலுவடைவதற்கான வாய்ப்புகள் குறைவாகவே உள்ளன.

– இது, பிபிசிக்காக கலெக்டிவ் நியூஸ்ரூம் வெளியீடு