காசாவில் உயிருடன் இருக்கும் கடைசி அமெரிக்க பணயக்கைதியாகக் கருதப்படும் எடன் அலெக்சாண்டரை விடுவிப்பதாக ஹமாஸ் அறிவித்துள்ளது , அதே நேரத்தில் போர்நிறுத்தப் பேச்சுவார்த்தைகளை மீண்டும் தொடங்குவதற்கான முயற்சிகளை அது மேற்கொண்டு வருகிறது.

அமெரிக்கா உட்பட பல நாடுகளால் பயங்கரவாத அமைப்பாக பட்டியலிடப்பட்டுள்ள பாலஸ்தீன போராளிக்குழு, நேற்று ஞாயிற்றுக்கிழமை தோஹாவில் அமெரிக்க பிரதிநிதிகளுடன் அரிதான நேரடிப் பேச்சுவார்த்தைகளை நடத்தியதாகக் கூறியது.

அலெக்சாண்டரின் விடுதலை 48 மணி நேரத்திற்குள் நடைபெறும் என்று எதிர்பார்க்கப்படுகிறது என்று ஹமாஸ் மூத்த அதிகாரிகள் தெரிவித்ததாக பல செய்தி நிறுவனங்கள் செய்தி வெளியிட்டுள்ளன.

21 வயதான அலெக்சாண்டரின் குடும்பத்தினர், அவர் வரும் நாட்களில் விடுவிக்கப்படலாம் என்று தங்களுக்குத் தெரிவிக்கப்பட்டதாகக் கூறினர்.

அலெக்சாண்டரின் விடுதலை எப்போது நடைபெறும் என்று அந்தக் குழு கூறவில்லை என்றாலும்,  அமெரிக்க அதிபர் டொனால்ட் டிரம்ப் அடுத்த வாரம் அந்தப் பகுதிக்குச் செல்லத் தயாராகி வரும் நிலையில் இந்த அறிவிப்பு வந்துள்ளது.

காசாவில் போர் நிறுத்தம், கைதிகள் பரிமாற்றம் மற்றும் மனிதாபிமான உதவிகளை வழங்குதல்” ஆகியவற்றை மையமாகக் கொண்டு பேச்சுவார்த்தை நடத்தப்பட்டதாக ஹமாஸ் அதிகாரிகள் செய்தி நிறுவனங்களுக்கு தெரிவித்தனர்.

காசாவில் உள்ள ஹமாஸ் தலைவர் கலீல் அல்-ஹய்யா ஒரு அறிக்கையில், போரை முடிவுக்குக் கொண்டுவருதல், பாலஸ்தீனிய கைதிகள் மற்றும் காசாவில் இஸ்ரேலிய பணயக்கைதிகளை பரிமாறிக்கொள்வது மற்றும் காசாவில் அதிகாரத்தை ஒரு சுயாதீன தொழில்நுட்ப வல்லுநர்களிடம் ஒப்படைப்பது உள்ளிட்ட நீண்டகால போர் நிறுத்தத்திற்கான இறுதி ஒப்பந்தத்தை எட்டுவதற்கு ஹமாஸ் உடனடியாக தீவிர பேச்சுவார்த்தைகளைத் தொடங்க” தயாராக இருப்பதாகக் கூறினார்.

காசாவில் போர் நிறுத்தம் மற்றும் உதவி மையங்களை மீண்டும் திறப்பதற்கான முயற்சிகளின் ஒரு பகுதியாக, இரட்டை அமெரிக்க குடிமகனான இஸ்ரேலிய படைவீரான எடன் அலெக்சாண்டர் விடுவிக்கப்படுவார் என்று ஹமாஸ் ஒரு அறிக்கையில் தெரிவித்துள்ளது.