உலகின் மிகப்பெரிய மாதிரி தொடருந்துப் பாதை என்று நம்பப்படும் மினியாட்டூர் வுண்டர்லேண்ட் சுற்றுலா தலத்திற்கு வந்த 1,000க்கும் மேற்பட்ட பார்வையாளர்களை கண்ணீர் புகைக் குண்டுத் தாக்குதலால் வெளியேற்ற வேண்டியிருந்தது செய்திகள் வெளியாகியுள்ளன.

நேற்று சனிக்கிழமை ஹாம்பர்க்கின் மிகவும் பிரபலமான சுற்றுலா தலங்களில் ஒன்றில் கண்ணீர் புகைக் குண்டுகள் வீசப்பட்டதாக நகர தீயணைப்புத் துறை அதிகாரிகள் தெரிவித்தனர். 

சந்தேகிக்கப்படும் தாக்குதலுக்குப் பின்னால் யார் இருக்கிறார்கள் என்பது தெளிவாகத் தெரியவில்லை.

சம்பவத்தைத் தொடர்ந்து பல பார்வையாளர்கள் கண் மற்றும் சுவாச எரிச்சல் குறித்து புகார் அளித்தனர்.

சம்பவ இடத்திற்கு வந்த தீயணைப்பு வீரர்கள் எரிச்சலூட்டும் வாயு கசிவை கண்டறிந்து, உடனடியாக கட்டிடத்தில் இருந்த 1,000க்கும் மேற்பட்ட பார்வையாளர்களை வெளியேற்ற உத்தரவிட்டனர்.

சம்பவ இடத்திலேயே நாற்பத்தாறு பேர் சிகிச்சை பெற்றதாக தீயணைப்புத் துறை தெரிவித்துள்ளது. ஒருவர் அருகிலுள்ள மருத்துவமனைக்குக் கொண்டு செல்லப்பட்டார்.

தீயணைப்பு வீரர்கள் கட்டிடத்திற்குள் காற்றோட்டம் ஏற்படுத்திய பின்னர், சுமார் அரை மணி நேரம் கழித்து பார்வையாளர்கள் திரும்பி வர அனுமதிக்கப்பட்டனர்.

இந்த கசிவுக்குப் பின்னால் யார் இருக்கிறார்கள் என்பது தெரியவில்லை, இருப்பினும் சம்பவ இடத்தில் பயன்படுத்தப்பட்ட ஒரு கேனிஸ்டர் கண்டுபிடிக்கப்பட்டதாக காவல்துறைச் செய்தித் தொடர்பாளர் தெரிவித்ததாக dpa செய்தி நிறுவனம் தெரிவித்துள்ளது.

காவல்துறையினர் மேலதிக விசாரணையை மேற்கொண்டுள்ளதாக தீயணைப்புத் துறை மேலும் தெரிவித்துள்ளது.

மினியாட்டூர் வுண்டர்லேண்டில் உள்ள மாதிரி தொடருந்துப் பாதை 1,600 சதுர மீட்டருக்கும் (17,222 சதுர அடி) அதிகமாகவும், சுமார் 17,000 மீட்டர் (10.5 மைல்) நீளமுள்ள பாதையையும் கொண்டுள்ளது.

ஹாம்பர்க் நகர மையத்தில் உள்ள மினியேட்டூர் வுண்டர்லேண்ட், சகோதரர்கள் கெரிட் மற்றும் ஃபிரடெரிக் பிரவுன் ஆகியோரால் 2001 இல் தொடங்கப்பட்டது.

கடந்த ஆண்டு உலகம் முழுவதிலுமிருந்து கிட்டத்தட்ட 1.6 மில்லியன் மக்கள் வருகை தந்தனர்.

இந்த மாதிரி ரயில் பாதை, இத்தாலியின் வெனிஸ் லகூன், அமெரிக்காவின் கிராண்ட் கேன்யன் மற்றும் ஜெர்மனியின் நியூஷ்வான்ஸ்டீன் கோட்டை போன்ற பல உலகப் புகழ்பெற்ற சுற்றுலா தலங்களின் மினியேச்சர் அளவிலான மாதிரிகளைக் கொண்டுள்ளது.