அகமதாபாத்: ஐபிஎல் 2026 இறுதிப் போட்டி இன்று ஞாயிற்றுக்கிழமை அகமதாபாத்தில் உள்ள நரேந்திர மோடி ஸ்டேடியத்தில் நடைபெறுகிறது. நடப்பு சாம்பியன் ராயல் சேலஞ்சர்ஸ் பெங்களூருவும், ஷுப்மன் கில் தலைமையிலான குஜராத் டைட்டன்ஸும் இந்த மோதலில் சந்திக்கவுள்ளன.
உலகிலேயே பணக்கார டி20 லீகான ஐபிஎல் இறுதிப் போட்டிக்கு ராயல் சேலஞ்சர்ஸ் பெங்களூரு, மே 26 அன்று Qualifier 1-ல் குஜராத் டைட்டன்ஸை 92 ரன்கள் வித்தியாசத்தில் வீழ்த்தி, வலுவாக நுழைந்தது.முதல் குவாலிஃபையரில் தோல்வியடைந்த குஜராத் டைட்டன்ஸ், குவாலிஃபையர் 2 போட்டியில் ராஜஸ்தான் ராயல்ஸை ஏழு விக்கெட்டுகள் வித்தியாசத்தில் வீழ்த்தி, இறுதிப் போட்டிக்கு முன்னேறி மீண்டும் தங்கள் திறமையை நிரூபித்தது.
இத்தொடரில் ரஜத் பட்டீதார் தலைமையிலான பெங்களூரு அணியுடன் டைட்டன்ஸின் நான்காவது மோதல் இது. குஜராத் டைட்டன்ஸ் அணிக்கு, நரேந்திர மோடி ஸ்டேடியம் இந்த சீசனில் வெற்றி மைதானமாகவே இருந்துள்ளது. இங்கு விளையாடிய ஏழு போட்டிகளில் ஐந்து வெற்றி பெற்றுள்ளனர். சொந்த மைதான ரசிகர்களின் ஆதரவுடன் இரண்டாவது ஐபிஎல் பட்டத்தை வெல்லும் முனைப்பில் டைட்டன்ஸ் களமிறங்கும்.
IPL 2026: 400 ரன்களுக்கு மேல் அடித்தாலும், இந்த ராஜஸ்தான் வீரர் பெரியதாக எதிர்பார்த்தேன்.. முரளி கார்த்திக்
குஜராத் அணியின் பேட்டிங் பலம் பெரும்பாலும் தொடக்க வீரர்களான ஷுப்மன் கில் மற்றும் சாய் சுதர்சன் ஆகியோரைச் சார்ந்தே இருக்கும். இருவரும் ஆரஞ்சு கேப் பட்டியலில் முறையே இரண்டாம் மற்றும் மூன்றாம் இடங்களில் உள்ளனர். குவாலிஃபையர் 2-ல் ராஜஸ்தான் ராயல்ஸுக்கு எதிராக 104 ரன்கள் குவித்த கில், இத்தொடரில் 15 போட்டிகளில் 722 ரன்கள் எடுத்துள்ளார். சாய் சுதர்சன் 16 ஆட்டங்களில் 710 ரன்களைச் சேர்த்துள்ளார்.
பந்துவீச்சில், ககிசோ ரபாடா 16 போட்டிகளில் 28 விக்கெட்டுகளுடன் பர்பிள் கேப் பட்டியலில் முன்னிலை வகிக்கிறார். ரஷித் கான் 19 விக்கெட்டுகளையும், முகமது சிராஜ் 18 விக்கெட்டுகளையும், ஜேசன் ஹோல்டர் 17 விக்கெட்டுகளையும், பிரசித் கிருஷ்ணா 16 விக்கெட்டுகளையும் கைப்பற்றி அணியின் நம்பிக்கைத் தூண்களாக உள்ளனர்.
ராயல் சேலஞ்சர்ஸ் பெங்களூருவின் பேட்டிங்கில் விராட் கோலி 15 போட்டிகளில் 600 ரன்களுடன் முன்னிலை வகிக்கிறார். பந்துவீச்சில், அனுபவம் மிக்க புவனேஷ்வர் குமார் 15 ஆட்டங்களில் 26 விக்கெட்டுகளை வீழ்த்தி அசத்தியுள்ளார். தேவதத் படிக்கல், கேப்டன் ரஜத் பட்டீதார், க்ருணால் பாண்டியா, ரசிக் சலாம் டார் போன்றோரும் அணியின் இறுதிப் போட்டி பயணத்திற்கு முக்கியப் பங்களிப்பைச் செய்துள்ளனர்.
IPL 2026: இந்த வீரரை CSK உள்பட யாரும். டிரேட் செய்ய மாட்டார்கள்.. பேட்டிங்கே போச்சு.. பத்ரிநாத்
ஐபிஎல் வரலாற்றில் ராயல் சேலஞ்சர்ஸ் பெங்களூருவும், குஜராத் டைட்டன்ஸும் இதுவரை 9 முறை நேருக்கு நேர் மோதியுள்ளன. இதில் குஜராத் டைட்டன்ஸ் 5 போட்டிகளிலும், ராயல் சேலஞ்சர்ஸ் பெங்களூரு 4 போட்டிகளிலும் வெற்றி பெற்றுள்ளன.
இந்த அணிகளுக்கு இடையேயான போட்டிகளில், அதிகபட்ச ஸ்கோர் 254/5 (RCB, மே 26, 2026), குறைந்தபட்ச ஸ்கோர் 147/10 (GT, மே 4, 2024) ஆகும். மிகப்பெரிய ரன் வித்தியாச வெற்றி 92 ரன்கள் (RCB), விக்கெட் வித்தியாச வெற்றி 9 விக்கெட்டுகள் (RCB) எனப் பதிவாகியுள்ளது.
தனிநபர்களின் சாதனைகளைப் பொறுத்தவரை, விராட் கோலி 503 ரன்களுடன் அதிக ரன்கள் எடுத்தவராகவும், ஷுப்மன் கில் 104* ரன்களுடன் அதிகபட்ச தனிநபர் ஸ்கோரைக் கொண்டவராகவும் உள்ளனர். விராட் கோலி 17 சிக்ஸர்கள் மற்றும் 5 அரைசதங்களுடன் முன்னிலை வகிக்கிறார். பந்துவீச்சில், ரஷித் கான் 8 விக்கெட்டுகளுடன் அதிக விக்கெட்டுகளை வீழ்த்தியவராக உள்ளார்.
நரேந்திர மோடி ஸ்டேடியம் பிட்ச் பொதுவாக பேட்ஸ்மேன்களுக்கு சாதகமாக இருக்கும். இருப்பினும், சரியான பகுதிகளில் பந்துவீசும் பந்துவீச்சாளர்களுக்கும் இந்த மைதானம் ஒத்துழைக்கும். இந்த சீசனில் குஜராத் டைட்டன்ஸ் அணியின் வேகப்பந்து வீச்சாளர்கள் இந்த சூழ்நிலையைச் சிறப்பாகப் பயன்படுத்தியுள்ளனர். இங்கு நடந்த கடைசி ஆட்டத்தில் குஜராத் டைட்டன்ஸ் 229/4 எடுத்தது.
இரு அணிகளிலும் சிறந்த ஃபார்மில் இருக்கும் பேட்ஸ்மேன்கள் மற்றும் பந்துவீச்சாளர்கள் நிறைந்திருப்பதால், ஐபிஎல் 2026 இறுதிப் போட்டி ஒரு விறுவிறுப்பான மோதலாக அமையும் என்பதில் சந்தேகமில்லை. இரு பக்கமும் மேட்ச் வின்னர்கள் இருப்பதால், அகமதாபாத்தில் ஞாயிற்றுக்கிழமை ஒரு தரமான போட்டி ரசிகர்களுக்குக் காத்திருக்கிறது.
இந்த இறுதிப் போட்டி மே 31 ஞாயிற்றுக்கிழமை, அகமதாபாத்தில் உள்ள நரேந்திர மோடி ஸ்டேடியத்தில் நடைபெறுகிறது. ஆட்டம் இந்திய நேரப்படி இரவு 7:30 மணிக்குத் தொடங்கும். இந்தப் போட்டியை Jio Hotstar செயலி அல்லது வலைத்தளத்திலும், ஸ்டார் ஸ்போர்ட்ஸ் நெட்வொர்க் தொலைக்காட்சிகளிலும் நேரடியாகப் பார்க்கலாம்.
IPL 2026: மும்பை இந்தியன்ஸ் அணி டிரஸிங் ரூம்மில் நடப்பதை வெளியே சொல்வது யார்? கடுப்பான அம்பானி
இரு அணிகளும் வலுவான வீரர்களைக் கொண்டுள்ளன. பெங்களூரு அணியில் ஃபில் சால்ட், விராட் கோலி, ரஜத் பாட்டீதார், புவனேஷ்வர் குமார் போன்றோரும்; குஜராத் அணியில் சாய் சுதர்சன், ஷுப்மன் கில், ஜாஸ் பட்லர், ரஷித் கான், ககிசோ ரபாடா போன்றோரும் தங்கள் அணியின் வெற்றிக்காகக் களமிறங்கத் தயாராக உள்ளனர்.
