அகமதாபாத்: 2026 ஐபிஎல் தொடரின் இறுதிப் போட்டி அகமதாபாத்தில் உள்ள நரேந்திர மோடி மைதானத்தில் நடைபெற உள்ளது. நடப்பு சாம்பியன் ராயல் சேலஞ்சர்ஸ் பெங்களூரு மற்றும் முன்னாள் சாம்பியன் குஜராத் டைட்டன்ஸ் அணிகள் மோதுகின்றன. இந்தப் போட்டி நடக்கும் நேரம், நேரலையில் எப்படி பார்ப்பது? ஸ்ட்ரீமிங் முறையில் எப்படி பார்ப்பது? போன்ற விவரங்களை காணலாம்.
நடப்பு சாம்பியனான பெங்களூரு அணி, முதல் தகுதிச் சுற்று ஆட்டத்தில் குஜராத் அணியையே வீழ்த்தி நேரடியாக இறுதிப்போட்டிக்கு முன்னேறியது. மறுபுறம், அந்தத் தோல்வியில் இருந்து மீண்ட குஜராத் அணி, இரண்டாவது தகுதிச் சுற்றில் ராஜஸ்தான் ராயல்ஸ் அணியை வீழ்த்தி இறுதிப்போட்டிக்குத் தகுதி பெற்றுள்ளது. இதன் மூலம் பெங்களூரு அணிக்கு எதிராக மீண்டும் ஒரு முறை மோதி பழிவாங்க குஜராத் அணிக்கு வாய்ப்பு கிடைத்துள்ளது.
இந்த இறுதிப் போட்டியில் பெங்களூரு அணி வெற்றி பெற்றால், ஐபிஎல் வரலாற்றில் சாம்பியன் பட்டத்தைத் தற்காத்துக் கொண்ட மூன்றாவது அணி என்ற பெருமையை அந்த அணி பெறும். இதற்கு முன்னதாக சென்னை சூப்பர் கிங்ஸ் மற்றும் மும்பை இந்தியன்ஸ் ஆகிய அணிகள் மட்டுமே தங்களது சாம்பியன் பட்டத்தைத் தக்கவைத்துள்ளன. அதே சமயம், குஜராத் அணி தனது சொந்த மைதானத்தில் விளையாடுவது அந்த அணிக்கு மிகப்பெரிய பலமாகப் பார்க்கப்படுகிறது. 2022-ல் சாம்பியன் பட்டம் வென்ற குஜராத், தற்போது 3-வது முறையாக இறுதிப்போட்டியில் களம் காண்கிறது.
ஆர்சிபி மற்றும் குஜராத் அணிகளுக்கு இடையிலான இந்த இறுதிப்போட்டி இன்று (மே 31, 2026) நடைபெறுகிறது. இந்தப் போட்டி அகமதாபாத்தில் உள்ள உலகின் மிகப்பெரிய கிரிக்கெட் மைதானமான நரேந்திர மோடி மைதானத்தில் நடைபெறுகிறது. சுமார் 1.30 லட்சம் ரசிகர்கள் முன்னிலையில் இந்தப் போட்டி அரங்கேற உள்ளது.
நேரம்: இறுதிப்போட்டி இன்று இரவு 7:30 மணிக்குத் தொடங்குகிறது. இதற்கான டாஸ் நிகழ்வு இரவு 7:00 மணிக்குப் போடப்படும்.
தொலைக்காட்சி ஒளிபரப்பு: ஸ்டார் ஸ்போர்ட்ஸ் நெட்வொர்க் சேனல்களில் போட்டியை நேரலையில் காணலாம். தமிழ் உட்பட பல்வேறு மொழிகளில் நேரலை வர்ணனை உண்டு.
நேரலை ஸ்ட்ரீமிங்: ஆன்லைனில் ஜியோ ஹாட்ஸ்டார் (Jio HotStar) செயலியில் இந்தப் போட்டியை நேரலையில் கண்டு ரசிக்கலாம்.
வானிலை அறிக்கையின்படி இன்று மழை பெய்ய வாய்ப்பு இல்லை என்பதால், ரசிகர்கள் முழுமையான 20 ஓவர் ஆட்டத்தைக் கண்டு களிக்கலாம். சொந்த மண்ணில் குஜராத் தனது ஆதிக்கத்தைச் செலுத்துமா அல்லது பெங்களூரு அணி மீண்டும் மகுடம் சூடுமா என்பதை அறிய ஒட்டுமொத்த கிரிக்கெட் உலகமும் ஆவலுடன் காத்திருக்கிறது.
