மியான்மரின் வடகிழக்கு பகுதியில் உள்ள ஒரு சுரங்க வெடிபொருள் கிடங்கில் ஞாயிற்றுக்கிழமை மதியம் ஏற்பட்ட சக்திவாய்ந்த வெடிவிபத்தில் சிக்கி, குழந்தைகள் உட்பட 45-க்கும் மேற்பட்டோர் பரிதாபமாக உயிரிழந்துள்ளனர். மேலும், 70-க்கும் மேற்பட்டோர் பலத்த காயமடைந்து உயிருக்கு ஆபத்தான நிலையில் மருத்துவமனையில் அனுமதிக்கப்பட்டுள்ளதாக மீட்புக் குழுவினர் மற்றும் உள்ளூர் ஊடகங்கள் தெரிவித்துள்ளன. இந்த பயங்கர வெடிவிபத்தின் காரணமாக அப்பகுதியே போர்க்களம் போல காட்சியளிக்கிறது.
சீன எல்லைக்கு மிக அருகில் வெறும் 3 கிலோமீட்டர் தொலைவில் அமைந்துள்ள நம்ஹ்காம் (Namhkam) நகரின் கௌங்டப் (Kaungtup) கிராமத்தில் இந்த விபத்து அரங்கேறியுள்ளது. மியான்மர் மத்திய அரசுக்கு எதிராக ஆயுதமேந்திப் போராடி வரும் ‘தாங் தேசிய விடுதலை ராணுவம்’ (TNLA) என்ற இனக்குழு அமைப்பின் கட்டுப்பாட்டில் இப்பகுதி உள்ளது. இந்த அமைப்பின் பொருளாதாரப் பிரிவு, சுரங்கப் பணிகள் மற்றும் கல் குவாரிகளுக்காகப் பயன்படுத்தி வந்த ‘ஜெலிக்னைட்’ (Gelignite) எனப்படும் ரகசிய வெடிபொருள் கிடங்கில் இந்த விபத்து நிகழ்ந்துள்ளது.
மதிய வேளையில் எதிர்பாராதவிதமாக இந்த வெடிபொருள் கிடங்கு வெடித்துச் சிதறியதில், அதன் தாக்கம் பல கிலோமீட்டர் தூரத்திற்கு எதிரொலித்துள்ளது. சம்பவ இடத்திற்கு விரைந்து வந்த மீட்புப் படையினர் இதுவரை 6 குழந்தைகள் உட்பட 46 பேரின் உடல்களை மீட்டுள்ளனர். மேலும், வெடிவிபத்து ஏற்பட்ட கிடங்கைச் சுற்றியிருந்த 100-க்கும் மேற்பட்ட குடியிருப்பு வீடுகள் இடிபாடுகளாக மாறி தரைமட்டமாகியுள்ளன. காயமடைந்த 74 பேர் உடனடியாக நம்ஹ்காம் அரசு மருத்துவமனைக்குக் கொண்டு செல்லப்பட்டுள்ளதால் பலி எண்ணிக்கை மேலும் உயரக்கூடும் என அஞ்சப்படுகிறது.
சுரங்கப் பணிகளுக்குப் பயன்படுத்தப்படும் ஜெலிக்னைட் ரக வெடிபொருட்கள், நீண்ட காலம் சரியாகப் பராமரிக்கப்படாமல் சேமித்து வைக்கப்படும் போது அதன் நிலைத்தன்மையை இழந்து தானாகவே வெடிக்கும் அபாயம் கொண்டது என்று நிபுணர்கள் கூறுகின்றனர். இந்த விபத்து தற்செயலாக நடந்ததா அல்லது ஏதேனும் சதி வேலைகளா என்பது குறித்துத் தாங் தேசிய விடுதலை ராணுவத்தினர் தீவிர விசாரணை நடத்தி வருகின்றனர். தற்போது பாதிக்கப்பட்ட மக்களுக்கு மியான்மர் உள்ளூர் அமைப்புகள் மற்றும் சீன எல்லைப் பகுதி தொண்டர்கள் இணைந்து அவசர நிவாரண உதவிகளை வழங்கி வருகின்றனர்.
