பிரிட்டன் அரசியல் வரலாற்றில் மிக முக்கியப் பரபரப்பை ஏற்படுத்தியுள்ள முன்னாள் அமெரிக்க தூதர் பீட்டர் மேண்டல்சன் (Peter Mandelson) தொடர்பான 1,000 பக்கங்களுக்கும் அதிகமான ரகசியக் கோப்புகளைப் பிரிட்டிஷ் அரசு அதிகாரப்பூர்வமாக வெளியிட்டுள்ளது. இந்த ஆவணங்கள் பிரிட்டன் பிரதமர் கீர் ஸ்டார்மரின் (Keir Starmer) தலைமைத்துவ ஆளுமையைக் கடுமையாகச் சாடுவதாக அமைந்துள்ளன. கடந்த ஆண்டு மேண்டல்சன் மற்றும் தற்போதைய கேபினட் அமைச்சர் பாட் மெக்ஃபேடன் ஆகியோருக்கு இடையே பரிமாறப்பட்ட வாட்ஸ்அப் செய்திகள், லேபர் கட்சியின் உட்கட்சிப் பூசல்களையும் டவுனிங் ஸ்ட்ரீட் (No. 10) நிர்வாகத்தின் பலவீனங்களையும் வெளிச்சத்திற்கு கொண்டு வந்துள்ளன.
வெளியாகியுள்ள இந்த அதிரடி ஆவணங்களின்படி, பிரதமர் கீர் ஸ்டார்மருக்கு போதிய வீரியமோ (Verve) அல்லது மக்கள் ஈர்ப்போ இல்லை என்று மேண்டல்சன் சாடியுள்ளார். ஸ்டார்மர் எப்போதுமே ஒரு நெருக்கடி நிலை வரும்போது பின்வாங்கும் அல்லது மண்டியிடும் (Buckle under pressure) குணம் கொண்டவர் என்றும், அவர் அமெரிக்க அதிபர் டொனால்ட் டிரம்ப் போல அதிரடியாகவும் ரிஸ்க் எடுக்கக்கூடிய வகையிலும் (Trumpian approach) செயல்பட வேண்டும் என்றும் மேண்டல்சன் வாட்ஸ்அப்பில் பதிவிட்டுள்ளார். மேலும், ஸ்டார்மரின் டவுனிங் ஸ்ட்ரீட் அலுவலகம் முற்றிலுமாக திக்குதெரியாமல், தனித்து விடப்பட்டு (Beleaguered and bereft) இயங்குவதாகவும், அங்குள்ள அதிகாரிகளுக்கு பிரதமர் என்ன நினைக்கிறார் என்றே தெரியவில்லை என்றும் அவர் வறுத்தெடுத்துள்ளார்.
இந்த விவகாரத்தில் மற்றொரு முக்கியப் திருப்பமாக, நாடாளுமன்ற உத்தரவின்படி விசாரணைக்காகத் தனது தனிப்பட்ட தொலைபேசியை (Personal Phone) அரசிடம் ஒப்படைக்க பீட்டர் மேண்டல்சன் திட்டவட்டமாக மறுத்துவிட்டார் (Refused to handover). இதன் மூலம் தனது பல முக்கிய வாட்ஸ்அப் உரையாடல்களைப் பொதுவெளியில் வராமல் அவர் தடுத்துள்ளார். அதேநேரம், தான் அமெரிக்க தூதராக நியமிக்கப்பட்டபோது வெளியுறவுச் செயலர் டேவிட் லாமியிடம் எழுதிய கடிதத்தில், “என்னை இந்த பதவிக்குத் தேர்ந்தெடுத்ததற்காக நீங்கள் ஒருபோதும் வருத்தப்பட மாட்டீர்கள்” (You won’t regret me) என்று அவர் உறுதியளித்திருந்த வாசகமும் இந்த கோப்புகளின் மூலம் அம்பலமாகி பெரும் விவாதத்தை ஏற்படுத்தியுள்ளது.
பாலியல் குற்றவாளி ஜெஃப்ரி எப்ஸ்டீனுடனான நெருங்கிய நட்பு வெளிச்சத்திற்கு வந்ததைத் தொடர்ந்து, கடந்த ஆண்டு செப்டம்பரில் மேண்டல்சன் தூதர் பதவியிலிருந்து அதிரடியாக நீக்கப்பட்டார். இந்த விவகாரத்தில் பிரதமர் ஸ்டார்மருக்குத் தவறான தகவல்கள் அளிக்கப்பட்டதாக எழுந்த குற்றச்சாட்டுகள் ஏற்கனவே லேபர் கட்சிக்குள் பெரும் புயலைக் கிளப்பியிருந்த சூழலில், தற்போது வெளியாகியுள்ள மேண்டல்சனின் ரகசியக் கோப்புகள் மற்றும் வாட்ஸ்அப் விமர்சனங்கள் பிரதமர் கீர் ஸ்டார்மரின் அரசியல் அதிகாரத்திற்குப் பெரும் முட்டுக்கட்டையாக மாறியுள்ளன.
